"ქრისტიან-დემოკრატები" სამარშუტო ტაქსით მგზავრობის საფასურის შესაძლო გაძვირების წინააღმდეგ გამოდიან და არსებული ღირებულების შენარჩუნებას მოითხოვენ.
როგორც საკრებულოში დღეს გამართულ ბრიფინგზე "ქრისტიან- დემოკრატმა" დეპუტატმა ჯაბა სამუშოამ განაცხადა, სამარშუტო ხაზების ტენდერში გამარჯვებულ კომპანიებს ვალდებულება აქვთ აღებული, რომლის თანახმადაც 2012 წლის 1 იანვრამდე მგზავრობის ღირებულება არ უნდა გაიზარდოს.
"ორი დღის წინ დავით ასანიძემ განაცხადა, რომ ივლისიდან შესაძლოა მგზავრობის ფასი გახდეს 80 თეთრი. ეს ის პიროვნებაა, რომელიც ტენდერის ჩატარების დროს გამარჯვებულ 4 კომპანიას წარმოადგენდა და მან სატენდერო კომისიას განუცხადა და პირობა დადო, რომ 2012 წლის იანვრამდე მგზავრობის ფასი არ გაიზრდებოდა. მართალია, ასანიძე ახლა საფასურის 80 თეთრამდე შესაძლო გაზრდას უარყოფს, მაგრამ მე მაქვს ჩანაწერი, რომელიც გაზეთ "რეზონანსის" ჟურნალისტმა მომაწოდა და რომელშიც ის სწორედ მგზავრობის ღირებულების მოსალოდნელ გაძვირებაზე საუბრობს", - განაცხადა სმაუშიამ.
აღნიშნულის კონტექსტში, "ქრისტიან-დემოკრატების" წარმომადგენელი მერიას მიმართავს, "გადახედოს იმ დებულებებს, რომელიც სატენდერო კომისიამ აღნიშნული კომპანიების მისამართით გამოიტანა და გადაიდგას შესაბამისი ნაბიჯები, რათა ამ კომპანიების მიერ აღებული ვალდებულებები შესრულდეს.
სამუშიას თქმით, ასევე ცუდ მდგომარეობაში ვარდებიან სამარშუტო ტაქსების მძღოლებიც, რომელთა ნაწილიც შესაძლოა უმუშევარი დარჩეს.
"გავრცელდა ინფორმაცია, რომლის თანახმადაც მძღოლებს 500 ევროს გადახდა მოუწევთ იმისთვის, რომ მუშაობა გააგრძელონ. როცა ტენდერი ჩატარდა, კომპანიებმა აიღეს ვალდებულება, რომლის თანახმადაც, ახალი ტრანსპორტის შემოყვანის შემდეგ მოხდებოდა აღნიშნული მძღოლების ყველანაირი პირობის გარეშე დასაქმება. აუცილებელია რომ კომპანიის მიერ ამ ნაბიჯის მცდელობა აღვკვეთოთ" - განმარტა მან.
მისივე თქმით, 2012 წლის 1-ელი იანვრიდანაც ტრანსპორტზე ფასი მხოლოდ იმ შემთხვევაში უნდა გაიზარდოს, თუ საქართველოში ნავთობის ფასი მსოფლიო ნათობის ფასიდან გამომდინარე, მნიშვნელოვნად მოიმატებდა.