საქართველოში მცხოვრებ მოქალაქეობის არმქონე პირს უფლება ეძლევა, შეკრებებისა და მანიფესტაციებს ორგანიზატორი და პასუხისმგებელი იყოს. ამის შესახებ "შეკრებებისა და მანიფესტაციების შესახებ" კანონპროექტის ერთ-ერთმა ავტორმა პავლე კუბლაშვილმა პროექტის განმარტებისას განაცხადა.
მისი თქმით, კანონპრექტში გაიპარა შეცდომა, რომელიც საქართველოში მცხოვრებ მოქალაქეობის არმქონე პირს შეზღუდვებს უწესებს.
"კანონპროექტში წერია, რომ მოქალაქეობის არმქონე პირი შეიძლება იყოს აქციის ორგანიზატორი, მაგრამ ტექსტში ერთგან არის გაპარული, რომ შეიძლება შეზღუდვა დაწესდეს. თუმცა ვადასტურებ, რომ ეს ნორმა ისე იქნება კანონში, როგორც საკონსტიტუციო სასამართლომ მოითხოვა", - აღნიშნა დეპუტატმა.
მისი თქმით, წარმოდგენილი საკანონმდებლო ინიციატივის თანახმად, უცხო ქვეყნის მოქალაქეს არ ექნება უფლება იყოს ორგანიზატორი შეკრებების და მანიფესტაციებს, ხოლო საქართველოში მცხოვრებ მოქალაქეობის არმქონე პირს ეს უფლება მიეცემა.
