„რესპუბლიკური პარტიის" ერთ-ერთ ლიდერ თინა ხიდაშელის განცხადებით, შეკრებისა და მანიფესტაციების შესახებ კანონში დაგეგმილი ცვლილებები არაკონსტიტუციურია. როგორც ხიდაშელმა დღეს გამართულ პრესკონფერენციაზე განაცხადა, "რესპუბლიკური პარტია" შეშფოთებულია ტენდენციით, რომელიც საქართველოს პარლამენტში ბოლო წლებში დამკვიდდრდა.
„ყოველი მორიგი მასობრივი აქციის შემდეგ ხელისუფლების მხრიდან კანონის გამკაცრება მოჰყვება-ხოლმე და, შესაბამისად, მანიფესტაციების კონსტიტუციური უფლებების შეზღუდვა ხორციელდება. მე-9 მუხლი, შეკრებისა და მანიფესტაციის უფლების შეზღუდვის და რეალურად აკრძალვის კლასიკური მაგალითია, რადგან ამ მუხლით მრავალი დებულება წინააღმდეგობაშია კონსტიტუციასთან და საერთაშორისო პრინციპებთან. ვკითხულობთ "შესაბამის ორგანოს", კანონის პრინციპებიდან გამომდინარე სრულიად გაუგებარია, ვინ არის "შესაბამისი ორგანო", რა კომპენტენციის ფარგლებში მოქმედებს და როგორ დგინდება ორგანოს შესაბამისობა. მუხლი მთლიანად წინააღმდეგობაშია საქართველოს კონსტიტუციასთან, ვინაიდან გამოხატვის თავისუფლების მსგავს შეზღუდვას კონსტიტუცია არ ითვალისწინებს. ამას არ ითვალისწინებს არც ევროპული კონვენცია ან რომელიმე სხვა საქართველოსთვის სავალდებულო საერთაშორისო აქტი. არავინ მართავს აქციებს უდაბნოში, შესაბამისად, შემოთავაზებული ცვლილებებით, შეუძლებელი გახდება შეკრების ჩატარება სადმე, სადაც ცოცხალი ადამიანები დადიან, ვინაიდან სახელისუფლო ტელევიზიები ყოველთვის იპოვიან ერთ ადამიანს, რომელიც იტყვის, რომ მის ბიზნესს ხელი ეშლება. ", - განაცხადა ხიდაშელმა.
ხიდაშელი მიიჩნევს, რომ სრულიად გაუგებარია და კომიკურია მე-11 მუხლით შემოთავაზებული ცვლილება, საიდანაც ირკვევა, რომ აკრძალულია შენობა-ნაგებობის მიმართ შეურაცხმყოფელი ქმდებების განხორციელება. აღნიშნული მოქმედება კი, სპეცრაზის საშუალებით შეკრებისა და მანიფესტაქციების დაშლის საფუძველი ხდება.
"მაგალითად, გზის გადაკეტვა. პროექტის მიხედვით, შესაძლებელია მხოლოდ იმ შემთხვევაში, თუ ადამიანების შესაბამისი რაოდენობაა მიტინგზე. თუმცა, როდის ითვლება რაოდენობა საკმარისად, გაუგებარია და მრავალგვარი ინტერპრეტაციის საშუალებას იძლევა. ამასთან, იმის გათვალისწინებით, რომ 20 მეტრის რადიუსის პრინციპი გვაქვს კანონში, მაგალითად, თბილისის საკრებულოს წინ აქციის მოწყობის შემთხვევაში, 200 და 300-კაციანი აქციაც საკმარისია გზის ნაწილობრივი გადაკეტისთვის, ხოლო უზენაესი სასამართლოს წინ აქციის შემთხვევაში, 50 ადამიანიც საკმარისი იქნება გზის სრულიად ბლოკირებისთვის. შესაბამისად, გაუგებარია, როდის, რა კრიტერიუმს გამოიყენებს ხელისუფლება", - აღნიშნა მან.
„გაუგებარია 20-მეტრიანი რადიუსის მოთხოვნის იმპერატიულად დაწესება სამართალდამცავი ორგანოების შენობებისთვის მთელი ქვეყნის მასშტაბით. ვინაიდან, როგორც მან განმარტა, აღნიშნულმა მოთხოვნამ შესაძლოა, რიგ შემთხვევებში სრულიად შეუძლებელი გახადოს პროტესტის ადეკვატური გამოხატვა, რადგან შენობების ირგვლივ თავისუფალი ტერიტორია არც ერთი მხრიდან არ არის 20 მეტრი", - აღნიშნა ხიდაშელმა.
