15 ივნისს, 19:00 საათზე თბილისში სასტუმროში Holiday Inn Tbilisi ასოციაცია ქართული ღვინო საექსპორტო ბაზრების განვითარების სამოქმედო გეგმის დოკუმენტის პირველადი ვერსიის დასრულებასთან დაკავშირებით მიღებას გამართავს.
მიღებას, რომელსაც საპატიო სტუმრის სტატუსით საქართველოს პირველი ლედი სანდრა-ელისაბედ რულოვსი დაესწრება, მისასალმებელი სიტყვით ასოციაცია ქართული ღვინის, ჰოლანდიის საგარეო საქმეთა სამინისტროსთან არსებული პროგრამა CBI-სა და ჰოლანდიის საელჩოს წარმომადგენლები გახსნიან. მოწვეულ სტუმრებს შორის მთავრობის, დიპლომატიური კორპუსის, საერთაშორისო ორგანიზაციების და ღვინის მწარმოებელი კომპანიების წარმომადგენლები იქნებიან.
დოკუმენტი მოიცავს ქართული ღვინის სექტორის ზოგად დახასიათებას, პრიორიტეტული საექსპორტო ბაზრების მიმოხილვასა და ზოგადი სტრატეგიის მარკეტინგულ მიმართულებებს, ექსპორტის პროცესებში არსებული წინააღმდეგობების ჩამონათვალსა და მათი გადაჭრის გზებს.
2010 წლის დეკემბრიდან ასოციაცია ქართული ღვინო ჰოლანდიის საგარეო საქმეთა სამინისტროსთან არსებული პროგრამა CBI-ს ხელშეწყობით მუშაობდა ღვინის სექტორის საექსპორტო ბაზრების განვითარების სამოქმედო გეგმაზე. ასოციაციამ მოახდინა ინფორმაციების ფასილიტაცია და და ერთიან დოკუმენტად ჩამოყალიბება. დოკუმენტის შექმნაში მონაწილეობას იღებდნენ შემდეგი მხარეები: საქართველოს სოფლის მეურნეობის სამინისტრო; ვაზისა და ღვინის დეპარტამენტი „სამტრესტი"; საქართველოს ეროვნული საინვესტიციო სააგენტო; საქართველოს ტურიზმის ეროვნული სააგენტო; ასოციაცია ქართული ღვინის წევრი მწარმოებელი კომპანიები.
