საქართველოს შინაგან საქმეთა მინისტრი ვანო მერაბიშვილი მალტას სტუმრობდა.
შსს-ის ინფორმაციით, ვიზიტის ფარგლებში, ხელი მოეწერა შეთანხმებას „საქართველოს მთავრობასა და მალტის მთავრობას შორის დანაშაულის წინააღმდეგ ბრძოლაში თანამშრომლობის შესახებ".
აღნიშნული შეთანხმება ითვალისწინებს ორი ქვეყნის სამართალდამცავი სტრუქტურების თანამშრომლობას ორგანიზებული დანაშაულის, ტერორიზმის, ნარკოტიკებითა და ფსიქოტროპული ნივთიერებებით უკანონო ვაჭრობის, იარაღის უკანონო ბრუნვის, ტრეფიკინგის, უკანონო მიგრაციის, კიბერდანაშაულისა და უკანონო შემოსავლის ლეგალიზაციის წინააღმდეგ ბრძოლაში.
„აღნიშნული დანაშაულების თავიდან აცილების, გამოვლენის, გახსნისა და აღკვეთის მიზნით, შეთანხმების მხარეების კომპეტენტური ორგანოები გაცვლიან ოპერატიულ და სამართლებრივ ინფორმაციას და მონაცემებს, დაეხმარებიან ერთმანეთს ოპერატიულ-სამძებრო საქმიანობის წარმართვაში და ძებნილ პირთა ძებნაში, ითანამშრომლებენ პერსონალის ტრენინგისა და კვალიფიკაციის ამაღლების სფეროში, გაცვლიან ექსპერტებს და მიაწვდიან ერთმანეთს ინფორმაციას, რომელიც დაკავშირებულია დანაშაულის მიზეზთან და სახეებთან", - ნათქვამია შსს-ის განცხადებაში.
