დედაქალაქის მერის, გიგი უგულავას შეფასებით, 26 მაისს პოლიციის მხრიდან ძალის გადამეტებას ადგილი ჰქონდა, თუმცა აქციის დაშლა ლეგიტიმური იყო.
ამის შესახებ უგულავამ გუშინ, ონლაინ-კონფერენციაზე განაცხადა, თუმცა აქვე განმარტა, რომ სამართალდამცველების მხრიდან მომიტინგეების მიმართ ძალის გადამეტება მას შემდეგ მოხდა, რაც მანქანების კოლონა პოლიციელთა ჯგუფში შევარდა და რამდენიმე მათგანი იმსხვერპლა.
"როცა სამართლადამცველებმა დაშლის გადაწყვეტილება მიიღეს, ეს იყო ლეგიტიმური. მაგრამ რა თქმა უნდა, იყო მთელ რიგ შემთხვევებში ძალის გადამეტებაც. ეს განპირობებული იყო იმით, რომ მოხდა ავადსახსენებელი მომენტი, როცა მანქანების კოლონა შევარდა და 10 პოლიციელი წაიქცა. მაშინვე გავრცელდა ერთმანეთში ინფორმაცია, რომ მასობრივად დაიღუპნენ პოლიციელები. მთელ მსოფლიოში ასეა - პოლიცია ყველაზე მძიმედ რეაგირებს პოლიციელის გარდაცვალებაზე. ძალის გადამეტების შემთხვევებიც, დაახლოებით 5-7 წუთი, სწორედ ამის შემდეგ დაფიქსირდა. მინისტრის ჩარევაც კი გახდა საჭირო, რათა ეს ემოციური მუხტი გაჩერებულიყო", - განაცხადა უგულავამ.
ამასთან, დედაქალაქის მერმა, მომხდარის თაობაზე სპეციალური კომისიის შექმნის მიზანშეწონილობის შესახებ დასმულ შეკითხვასაც უპასუხა და აღნიშნა, რომ თუ აქციის დარბევის ლეგიტიმურობის შემსწავლელი კომისია შეიქმნება, პირველ რიგში, ისიც უნდა შეფასდეს, „თუ რა იყო დაგეგმილი „სახალხო კრების" მიერ და რა ვერ შესრულდა".
