მედიასახლ "პალიტრასთან" მედიის წარმომადგენლების აქცია მიმდინარეობს. აქციას, რომელიც მედიასახლისთვის სოლიდარობის გამოხატვის მიზნით იმართება, ოპოზიციონერი ლიდერებიც ესწრებიან.
"ეს არის გაგრძელება იმისა, რაზეც ვსაუბრობდით - 26 მაისს სააკაშვილმა მოახდინა დიქტატორული რეჟიმის გაფორმება და ყველანაირად ცდილობს ხალხის დაშინებას. ჩვენ სოლიდარობას ვუცხადებთ მედიაპალიტრას, რომელიც შესაძლოა უკანონობის მსხვერპლი გახდეს", - განუცხადა ჟურნალისტებს აქციაზე მისულმა "დემოკრატიული მოძრაობის" ლიდერმა ნინო ბურჯანაემ.
ამასთან, მისივე თქმით, პირადად მისთვის ცნობილია ის სცენარი, რითაც შემოსავლების სამსახური ამა თუ იმ ორგანიზაციაში შედის.
"ჩემთვის ცნობილია როგორ შედის შემოსავლების სამსახური ამა თუ იმ ორგანიზაციაში და აფორმებს უკანონობას. ეს ხდება იმ შემთხვევაში, როცა ორგანიზაცია ამბობს სიმართლეს და არ ეთანხმება ხელისუფების პოზიციას. თუ ხმას არ ამოვიღებთ მედიაზე ეს ზეწოლები გაგრძელდება", - განმარტა ბურჯანაძემ. აქციას ასევე ეროვნული ფორუმის ლიდერი კახა შარტავა, ქრისტიან-დემოკრატების წარმომადგენელი ინგა გრიგოლია და რესპუბლიკელების ლიდერები ესწრებიან.
