"რუსეთი მზად არის განიხილოს საქართველოს ხელთ არსებული ფაქტები, რომლებიც თითქოს რუსეთის სპეცსამსახურების მიერ საქართველოს ტერიტორიაზე ტერაქტების მომზადებას ეხება", _ ეს განცხადება ჟენევის საერთაშორისო მოლაპარაკებებზე რუსული დელეგაციის ხელმძღვანელმა გრიგორი კარასინმა გააკეთა.
"ჩვენი რეაქცია მოსალოდნელი იყო. მიგვეჩნიამ რომ ეს არის ვარჯიში საინფორმაციო-პროპაგანდისტულ საქმიანობაში. თუმცა ამასთან ერთად ჩვენ ასევე განვაცხადეთ, რომ თუ ქართულ მხარეს აქვთ სერიოზული ფაქტები, ჩვენ, როგორც პასუხისმგებლობის მქონე ქვეყანა, მზად ვართ ისინი განვიხილოთ, შევისწავლოთ დეტალები და გავაკეთოთ რაღაც კომენტარი ამასთან დაკავშირებით. ასეთი რამ ერთხელ უკვე მოხდა რამდენიმე თვის წინ, როდესაც შესაბამის მოთხოვნაზე ჩვენ ჩვენი ახსნა-განმარტებები გავაკეთეთ", _ აცხადებს კარასინი.
მისივე თქმით, მთავარია ეს აღმოჩნდეს, არა რაღაც გამონაგონი, არამედ სერიოზული მასალა, რომელიც სერიოზულ ანალიზს დაექვემდებარება.
ამასთან ერთად, გრიგორი კარასინი შეეხო რა ჟენევის მოლაპარაკებათა მორიგ რაუნდს, განაცხადა, რომ საქართველოს ხელისუფლება ცდილობს საზოგადოების კონსოლიდირებას ანტირუსულ საფუძველზე.
"საქართველოს წარმომადგენელი გიგა ბოკერია ეცადა ემოციურად და დეტალურად დაედანაშაულებინა რუსეთის სპეცსამსახურები საქართველოს ტერიტორიაზე ტეროტისტული აქტების სერიის ორგანიზებაში. ჩვენ ყოველივე ამას ყურადღებით მოვუსმინეთ ეს ხომ არ არის პირველი შემთხვევა, როდესაც ამგვარ თემებს ჟენევის დისკუსიებზე განვიხილავთ", _ აცხადებს კარასინი.
