ჟენევის მოლაპარაკებები, შესაძლოა, შეწყდეს.როგორც საქართველოს უშიშროების საბჭოს მდივანი გიგა ბოკერია აცხადებს, უსაფრთხოების საკითხებზე მოლაპარაკებებს იმ სახელმწიფოსთან, რომელიც დიალოგის პარალელურად საქართველოს ტერიტორიაზე ტერორისტულ აქტებს გეგმავს და ახორციელებს, აზრი ეკარგება.
„გუშინ გამართული შეხვედრის მთავარი თემა სწორედ რუსეთის სპეცსამსახურების მხრიდან საქართველოს ტერიტორიაზე ტერორისტული აქტების მომზადება და განხორციელება იყო, რომელიც წარსულში წარმატებულად, ბოლო პერიოდში კი, ქართული სამართალდამცავი უწყებების ეფექტური მუშაობის წყალობით, წარუმატებელი გამოდგა. ჩვენ ვზივართ მოლაპარაკების მაგიდასთან იმ სახელმწიფოსთან, რომელიც აგრძელებს ტერორისტული აქტების ორგანიზებას. თუკი ასეთი ქმედებები გაგრძელდება, დისკუსიას უსაფრთხოების საკითხებზე ისეთ ქვეყანასთან, რომელიც, პარალელურად, ჩვენს ტერიტორიაზე ტერორისტულ ქმედებებს ახორციელებს, აზრი ეკარგება, მათ შორის ჟენევის ფარგლებში", - განუცხადა ბოკერიამ ჟურნალისტებს.
მისივე თქმით, ქართული მხარის მიერ დაყენებულ პირობასთან დაკავშირებით, რომ შეწყვიტოს საქართველოს ტერიტორიაზე ტერორისტული აქტების ორგანიზება და განხორციელება, რუსეთის დელეგაციის წარმომადგენლებს კონკრეტული პასუხი არ გაუციათ.
შეგახსენებთ, რომ ჟენევაში მოლაპარაკებათა მე-16 რაუნდი გუშინ გაიმართა. შეხვედრის ძირითად თემას სწორედ რუსეთის მიერ საქართველოში დაგეგმილი და განხორციელებული ტერორისტული აქტები წარმოადგენდა.
