კონტროლის პალატამ იმუნიზაციის პროგრამაში საბიუჯეტო სახსრების უკანონო ხარჯვის ფაქტი გამოავლინა. ამის შესახებ ნათქვამია კონტროლის პალატის 2010 წლის ანგარიშში, რომელიც პარლამენტს უკვე წარედგინა.
ანგარიშის თანახმად, სხვადასხვა წლებში, ვაქცინების მიწოდების პროცესში არაკოორდინირებული და შეუთანხმებელი ქმედებების გამო ვაქცინების მოკლე პერიოდში გაუვარგისებით, სახელმწიფომ 132, 9 ათასი ლარი იზარალა.
კერძოდ, წითელა-წითურა-ყბაყურის ვაქცინების შესაძენად გამოყოფილი ბიუჯეტი განზრახ იქნა მორგებული მიმწოდებელი კომპანიის ამონაგებზე. შესყიდვები ყოველგვარი დასაბუთების გარეშე დაიგეგმა იმდაგვარად, რომ ბიუჯეტი მთლიანად მიიმართა კომპანია "ნ ფარმი +"-ზე.
პროგრამის ფარგლებში შეძენილ იქნა იაფფასიანი დაფასოების, საჭირო მარაგზე ნაკლები და ვარგისიანობის მოკლე ვადის მქონე ვაქცინა და შესაბამისად, გაიზარდა ერთეული ვაქცინის ფასი, რითაც ბიუჯეტი დაზარალდა.
ანგარიშში აღნიშნულია, რომ კანონდარღვევით განხორციელებული შესყიდვებით სახელმწიფო ბიუჯეტს მიადგა 1788, 9 ათასი ლარის ზარალი.
კონტროლის პალატის ანგარიში 2007-2009 წლების აუდიტის შედეგებს მოიცავს.
