საქართველოს საგარეო საქმეთა სამინისტრო ქართული მხარის მიერ აღკვეთილ მორიგ ტერორისტულ აქტს ეხმაურება და აცხადებს, რომ რუსეთი მიზანმიმართულად აგრძელებს საქართველოს წინააღმდეგ ტერორისტული აქტების ორგანიზებას.
„რუსეთის ფედერაცია და მისი სპეცსამსახურები განაგრძობენ საქართველოს სახელმწიფოებრიობის წინააღმდეგ მიმართულ დანაშაულებრივ პოლიტიკას, რომელიც უკვე აშკარა სახელმწიფო ტერორიზმის ნიშნებს ატარებს", - ნათქვამია უწყების განცხადებაში.
საქართველოს საგარეო საქმეთა სამინისტრო მოუწოდებს საერთაშორისო თანამეგობრობას კატეგორიულად მოსთხოვოს რუსეთს შეწყვიტოს საქართველოს წინააღმდეგ მიმართული ტერორისტული საქმიანობა, აიღოს ძალის არგამოყენების ვალდებულება და მოახდინოს საქართველოს ტერიტორიის სრული დეოკუპაცია.
შეგახსენებთ, რომ გუშინ, 6 ივნისს, შინაგან საქმეთა სამინისტროს თანამშრომლების მიერ აღკვეთილი იქნა ტერორისტული აქტის განხორციელების კიდევ ერთი მცდელობა. სამართალდამცავების მიერ მცხეთის რაიონში დაკავებულ იქნა ბადრი გოგიაშვილი. დაკავებულ პირს თან ჰქონდა ასაფეთქებელი ნივთიერება, რომელიც პოლიციამ ამოიღო და გააუვნებელყო.
დაკავებული პირის ჩვენებით ირკვევა, რომ მას ოკუპირებული ცხინვალის რეგიონის ახალგორის რაიონში განლაგებული საოკუპაციო ძალების, კერძოდ რუსეთის უშიშროების ფედერალური სამსახურის სასაზღვრო ჯარების უფროსის მოადგილის ალექსეი სოკოლოვის, ახალგორის ე.წ. „მილიციის" უფროსის ვლადიმერ ფუხაევის და ამავე ე.წ. „მილიციის" თანამშრომლის ვოვა კიბილოვის მიერ მიცემული ჰქონდა დავალება, მოეძებნა თბილისში ისეთი შენობა რომელზეც განთავსებული იქნებოდა რომელიმე საერთაშორისო ორგანიზაციის, ევროკავშირის ან ამერიკის შეერთებული შტატების დროშა.
ტერორისტული აქტის გასახორციელებლად ზემოხსენებულმა პირებმა შეარჩიეს თბილისში ნატოს სამეკავშირეო ოფისი და ბადრი გოგიაშვილს მოსთხოვეს მისთვის ახალგორში გადაცემული ბომბის აფეთქება ამ ოფისთან. დაკავებულის მიერ მიცემული ჩვენებიდან ირკვევა, რომ აღნიშნული ტერორისტული აქტის განხორციელებისთვის მისთვის უნდა გადაეხადათ 2 000 აშშ დოლარი.
