„ჭრიჭინ-ჭრიჭინით, წვალებით, პრობლემებით და წინაღობებით, მაგრამ საარჩევნო გარემოს გაუმჯობესების საკითხზე მოლაპარაკებები თანმიმდევრულად მიდის", - განუცხადა „ეროვნული ფორუმის" ლიდერმა კახა შარტავამ „ჯი-ეიჩ-ენს".
რაც შეეხება, ამ პროცესში სამოქალაქო საზოგადოების გააქტიურებას, რომელსაც „რვიანი" ხვალიდან შეუდგება, შარტავა მას გეგმის შემდგომ ნაწილად მიიჩნევს და აცხადებს, რომ საზოგადოების აზრი ამ პროცესში ერთ-ერთი გადამწყვეტია.
„ჩვენი პირველი ამოცანა იყო სწორი პოლიტიკური პროცესის შექმნა. შემდეგი პროცესისთვის საერთაშორისო მხარდაჭერის უზრუნველყოფა. ახლა კი აუცილებელია მასში სამოქალაქო საზოგადოების პირდაპირი ჩაბმა", - განმარტა შარტავამ.
მისივე თქმით, პროცესი იმის გამო ჭიანურდება, რომ საზოგადოების „შემობრუნება ქუჩიდან სწორი პოლიტიკისკენ" საკმაოდ ძნელია.
„თუმცა იმის გამო, რომ ვიღაცა მოდის და ხალხი გაყავს ქუჩაში, ისე რომ არ ვიცით, რას ავაშენებთ, ისევ ჩვენ დავისჯებით. განვლილი არასწორი ნაბიჯებისთვის ვისჯებით ხოლმე, მათ შორის სისხლითაც. იქნებ ამ უბედურებამ საზოგადოება მეტ-ნაკლებად დააფიქროს და მოახედოს ის სწორი პოლიტიკისკენ, რომლის შედეგიც ასე თუ ისე, პროგნოზირებადია", - აღნიშნა „ეროვნული ფორუმის" ლიდერმა.
