ოპოზიციური რვიანის ლიდერები ლევან გაჩეჩილაძეს საარჩევნო გარემოს შეცვლის იდეის ირგვლივ გაერთიანებას ურჩევენ.
"რვიანი ეს არის თემატური გაერთიანება. ის არ არის პოლიტიკური ფრონტი, ამიტომ საზოგადოების ნებისმიერ წარმომადგენელს აქვს უფლება მონაწილეობა მიიღოს საარჩევნო გარემოს გაუმჯობესების პროცესში, მათ შორის ლევან გაჩეჩილაძესაც", - ასე ეხმიანება "ეროვნული ფორუმის" ერთ-ერთი ლიდერი გუბაზ სანიკიძე გაჩეჩილაძის მიერ ოპოზიციური პარტიებისადმი გაერთიანების შესახებ მოწოდებას.
ამასთან, სანიკიძე ეთანხმება გაჩეჩილაძეს იმ საკითხში, რომ "დიდი საყოველთაო ერთობის გარეშე არაფერი აგამოვა" მაგრამ ჯი-ეიჩ-ენთან საუბარში აცხადებს, რომ "გაერთიანება არა ვინმეს გარშემო, არამედ საზოგადოების მოთხოვნის გარშემო უნდა მოხდეს".
რაც შეეხება ლევან გაჩეჩილაძის მიერ ახალი პოლიტიკური პარტიის შექმნისა და კახა კუკავასთან მისი გაერთიანების შესახებ ინფორმაციას, გუბაზ სანიკიძე მას წარმატებებს უსურვებს.
აღსანიშნავია რომ გაჩეჩილაძის მოწოდებასთან დაკავშირებით "ჯი-ეიჩ-ენთან" საუბარში კომენტარი გააკეთა თავისუფალი დემოკრატების ლიდერმა ირაკლი ალასანიამაც. მისი თქმით, ის მიესალმება გაერთიანების თაობაზე გაჩეჩილაძის "დაუღალავ მოწოდებას".
"გაჩეჩილაძე არ არის რვიანის წევრი, მაგრამ მისი დაუღალავი მოწოდება გაერთიანების თაობაზე მისასლმებელია. შექმნილი ახალი რეალობა ყველას აძლევს მეტ სივრცეს ვისაც სამართლიანი არჩევნები უნდა, იყოს ამ პროცესის მონაწილე", - განმარტა ირაკლი ალასანიამ.
