მომხმარებელთან ანგარიშსწორების ერთი თეთრის სიზუსტით განუხორციელებლობა ფულად დაჯარიმებას გამოიწვევს. აღნიშნულის შესახებ ცვლილება შედის "ადმინისტრაციულ სამართალდარღვევათა კოდექსში".
წარმოდგენილი კანონპროექტის თანახმად, მომხმარებელთან ანგარიშსწორების ერთი თეთრის სიზუსტით განუხორციელებლობა გამოიწვევს ფიზიკური პირის 200 ლარით დაჯარიმებას, ხოლო იურიდიული პირის 400 ლარის ოდენობით დაჯარიმებას.
ამასთან, მეწარმე სუბიექტის ან არასამეწარმეო (არაკომერციული) იურიდიული პირის მიერ მომხმარებლისგან ანგარიშსწორების პროცესში საქართველოს ეროვნული ბანკის მიერ დადგენილი კრიტერიუმების მიხედვით გადასახდელად ვარგისი ლარის ბანკნოტის ან მონეტის რომელიმე ნომინალის მიუღებლობა გამოიწვევს მეწარმე სუბიექტის ან არასამეწარმეო იურიდიული პირის დაჯარიმებას 400 ლარის ოდენობით.
გარდა ამისა, წარმოდგენილი საკანონმდებლო ინიციატივაში ასევე შემოდის ბანკნოტებისა და მონეტების რეპროდუცირების წესების დარღვევაზე ჯარიმა.
კერძოდ, ბანკნოტებისა და მონეტების რეპროდუცირების წესების დარღვევა გამოიწვევს ფიზიკური პირების დაჯარიმებას 1000 ლარის ოდენობით, ხოლო იურიდიული პირების 3000 ლარის ოდენობით.
