ეროვნული ვალუტის გამოყენების წესების დამრღვევს ფულადი ჯარიმა დაეკისრება. ამის შესახებ ცვლილება შედის "ადმინისტრაციულ სამართალდარღვევათა კოდექსში".
დღემდე არსებული მოქმედი ნორმის თანახმად, საქართველოს ტერიტორიაზე ეროვნული ვალუტის გამოყენების წესების დარღვევა ჯარიმდება შრომის ანაზღაურების ოციდან ორმოცდაათ მინიმალურ ოდენობამდე, ასეთი საქმიანობიდან მიღებული მთელი ამონაგების კონფისკაციით.
პარლამენტში წარმოდგენილი კანონპროექტის თანახმად, კი საქართველოს ტერიტორიაზე მიმოქცევაში არსებული ეროვნული ვალუტის გამოყენების წესების დარღვევა, მათ შორის ანგარიშსწორების პროცესში უცხოური ვალუტის გამოყენება (გარდა თავისუფალი ინდუსტრიული ზონებისა, თავისუფალი ვაჭრობის პუნქტებისა ან/და ეროვნული ბანკის მიერ განსაზღვრული შემთხვევებისა) გამოიწვევს ფიზიკური პირის 200 ლარის ოდენობით დაჯარიმებას, ხოლო იურიდიული პირის 400 ლარით დაჯარიმებას.
კანონპროექტის ინიციატორები არიან დეპუტატები ბეჟან ბუცხრიკიძე და ზვიად კუკავა.
