წყალმომარაგების კომპანიებს ლიცენზიის აღების ვალდებულება ემატებათ. აღნიშნულთან დაკავშირებით ცვლილება შედის "ელექტროენერგეტიკისა და ბუნებრივი გაზის შესახებ" კანონში.
მოქმედი ნორმის თანახმად, საქართველოს ენერგეტიკისა და წყალმომარაგების მარეგულირებელ ეროვნული კომისია ლიცენზიებს უვადოდ გასცემს ელექტროენერგიის წარმოებაზე; ელექტროენერგიის დისპეტჩერიზაციაზე; ელექტროენერგიის გადაცემაზე; ელექტროენერგიის განაწილებაზე; ბუნებრივი გაზის ტრანსპორტირებაზე და ბუნებრივი გაზის განაწილებაზე.
კანონპროექტის თანახმად, კი ზემოთ აღნიშნულ ჩამონათვალს წყალმომარაგებაც დაემატება და ლიცენზიის გარეშე კომპანია წყალმომარაგების განხორციელებას ვეღარ შესძლებს.
წარმოდგენილი ინიციატივით წყალმომარაგების ლიცენზიანტს ვალდებულება ემატება, რომ სასმელი წყლის წყალმომარაგების სისტემის ექსპლუატაცია განახორციელოს და მოსახლეობისთვის ხარისხიანი სასმელი წყლის მიწოდება უზრუნველყოს.
ამასთან, ლიცენზიანტი ვალდებული იქნება სასმელი წყლის ხარისხის მუდმივი კონტროლი განახორციელოს და არ დაუშვას მისი დაბინძურება.
კანონპროექტის ინიციატორი საქართველოს მთავრობაა, ხოლო ავტორი რეგიონული განვითარებისა და ინფრასტრუქტურის სამინისტრო.