საქართველოს ეროვნული მუზეუმი ძვ.წ.აღ-ის V საუკუნის "კუს ყელსაბამის" 12 ბურთულის დაკარგვის ფაქტს უარყოფს. როგორც "ჯი-ეიჩ-ენს" ეროვნული მუზეუმის ფონდის მცველმა დარეჯან კაჭარავამ განუცხადა, თორმეტივე ბურთულა საცავში ინახება.
"12-ვე ბურთულა ინახება საცავში და დაინტერესებულ პირს შეუძლია მივიდეს და ნახოს. ბურთულები დაზიანებულები არიან და ამიტომ გამოფენილი არ არის ", - განმარტა "ჯი-ეიჩ-ენთან" საუბრისას კაჭარავამ. '
"კუს ყელსაბამის" 12 ბურთულის დაკარგვის შესახებ ინფორმაცია გაზეთმა "ალიამ" გაავრცელა. გაზეთის ინფორმაციით, საქართველოს ეროვნული მუზეუმიდან ძვ.წ.აღ. V საუკუნის ოქროს სამკაულები დაიკარგა, რომლის ფასიც დაახლოებით (საერთაშორისო კლასიფიკაციით) 10 მილიონ დოლარს სცილდება. ვანის არქეოლოგიური გათხრების შედეგად აღმმოჩენილ ოქროს "კუს ყელსაბამს" 30 პატარა და 1 დიდი კუ ამშვენებს. ასევე მასზე არის 94 ოქროს ბურთულა. პორფესორმა ალეკო ცინცაძემ, რომელიც რიცხვით სიმბოლიკაზე იკვლევს მასალებს, აღმოაჩინა, რომ ყელსაბამზე 94-ის ნაცვლად 82 ბურთულაა.
