ანაკლიასა და განმუხურში ახლად აშენებული სასტუმროს ტერიტორიაზე სამორინეს მოწყობისთვის განსაკუთრებული შეღავათი იქნება. აღნიშნულთან დაკავშირებით ცვლილება შედის "სალიცენზიო და სანებართვო მოსაკრებლის შესახებ" კანონში.
კანონის მოქმედი ნორმით, სანებართვო მოსაკრებლის გადახდისაგან თავისუფლდება ბათუმში, აგრეთვე ქობულეთისა და ხელვაჩაურის მუნიციპალიტეტებში და ზუგდიდის მუნიციპალიტეტის სოფელ ანაკლიაში ახლად აშენებული არა ნაკლებ ასნომრიანი სასტუმროს ტერიტორიაზე სამორინეს მოწყობა.
შეღავათი ახლად აშენებული სასტუმროს ტერიტორიაზე სამორინეს მოწყობის ნებართვის გაცემიდან 10 წლის განმავლობაში მოქმედებს.
საქართველოს მთელ ტერიტორიაზე, გარდა ბათუმისა, დუშეთის მუნიციპალიტეტის ბაზალეთის ტბის მიმდებარე ტერიტორიისა, გუდაურის სარეკრეაციო ტერიტორიისა, დაბა ბაკურიანის ტერიტორიისა, ასევე ქობულეთის, ბორჯომის, წყალტუბოსა და სიღნაღის მუნიციპალიტეტების ტერიტორიებისა, სამორინეს მოწყობის ნებართვის მოსაკრებელი 5 000 000 ლარია; ბათუმში, დუშეთის მუნიციპალიტეტის ბაზალეთის ტბის მიმდებარე ტერიტორიაზე, ასევე ქობულეთისა და ბორჯომის მუნიციპალიტეტებში კი - 250 000 ლარი.
კანონპროექტის თანახმად, სანებართვო მოსაკრებლის გადახდისგან თავისუფლდება ანაკლიასა და სოფელ განმუხურში ახლად აშენებული არა ნაკლებ ოთხოცნომრიანი სასტუმროს ტერიტორიაზე სამორინეს მოწყობა.