ელექტრონული პირადობის მოწმობის აღება 30 ლარი ეღირება.
აღნიშნულთან დაკავშირებით ცვლილება "საქართველოს მოქალაქეთა და საქართველოში მცხოვრებ უცხოელთა რეგისტრაციის, პირადობის (ბინადრობის) მოწმობისა და საქართველოს მოქალაქის პასპორტის გაცემის წესის შესახებ" კანონში შედის.
დღეს არსებული რეგულაციის თანახმად, განაცხადის შეტანიდან მე-10 სამუშაო დღეს პირადობის მოწმობა უფასოდ გაიცემა; მე-5 სამუშაო დღეს, მომსახურების საფასური შეადგენს - 5 ლარს; მე-3 სამუშაო დღეს -10 ლარს;
24 საათის განმავლობაში აღების შემთხვევაში კი ის 25 ლარია. ხოლო პირადობის მოწმობის იმავე დღეს გასაცემად მომსახურების 50 ლარიანი საფასურის გადახდა უწევთ მოქალაქეებს.
აღნიშნული კანონპროექტის თანახმად კი, ელექტრონული პირადობის მოწმობა უფასად აღარ გაიცემა და მე-10 სამუშაო დღეს მისი აღების შემთხვევაში პირადობის მოწმობის საფასური - 30 ლარი იქნება; მე-5 სამუშაო დღეს -40 ლარი; მე-3 სამუშაო დღეს - 50 ლარი; განაცხადიდან მეორე დღეს - 60 ლარი, ხოლო იმავე დღეს 65 ლარი.
