საპარლამენტო უმრავლესობის წევრის, ნუგზარ წიკლაურის შეფასებით, "სახალხო კრებასა" და "ქართულ პარტიასთან" დაკავშირებით მისი წინასწარმეტყველება გამართლდა.
როგორც წიკლაურმა ლევან გაჩეჩილაძისა და კოკა გუნცაძის მიერ "ქართული პარტიის" დატოვების კომენტირებისას განაცხადა, ყველა პოლიტიკური ჯგუფი, რომელშიც არის პიროვნული დაპირისპირება, განწირულია ისეთი მარცხისთვის, რომელიც მათ განიცადეს მაისში.
"ჩვენ ვამბობდით, რომ ეს გამოცხადებული რევოლუციები დაემსგავსება გამოცხადებული პოლიტიკური სიკვდილის ქრონიკას და ამჟამად წარმოდგენილი ორი პარტიიდან, რომელიც წარმოადგენდა რევოლუციურ ფრთას, არც ერთი აღარ არსებობს - არც სახალხო კრება და არც "ქართული პარტია". მათი ზეგავლენა ქართულ პოლიტიკაზე ნულია", - დასძინა დეპუტატმა.
მისი შეფასებით, ახლა სულ ერთია ოქრუაშვილის მხარეს დარჩება ვინმე, თუ სხვა პარტიაში გადავა.
შეგახსენებთ, რომ დღეს გაჩეჩილაძესა და გუნცაძესთან ერთად "ქართული პარტია" კახა მიქაიამ და ლევან ჩიკვაიძემაც დატოვეს.
