„სამხრეთ ოსეთი (რუსეთი)", - ასე იყო მოხსენიებული საქართველოს ოკუპირებული ტერიტორია გავლენიანი ორგანიზაციის ყოველწლიურ ანგარიშში, სახელწოდებით "უარესები უარესთა შორის" გავრცელებულ პრესრელიზში.

მას შემდეგ, რაც ცხინვალის რეგიონის რუსეთის ტერიტორიად მოხსენიებას მედიის წარმომადგენელთა მხრიდან შეკითხვები, ოფიციალური თბილისისგან კი გაღიზიანება მოჰყვა, "ფრიდომ ჰაუსმა" შეცდომა გამოასწორა და ე.წ. სამხრეთ ოსეთის მოხსენიებისას პრესრელიზში რუსეთის ნაცვლად, ფრჩხილებში „საქართველო" მიუთითა.

რადიო „თავისუფლების" ინფორმაციით, პრესრელიზში აღმოჩენილმა შეცდომამ საქართველოს რეინტეგრაციის საკითხებში სახელმწიფო მინისტრის აპარატის შეშფოთება გამოიწვია, რის გამოც ეკა ტყეშელაშვილის აპარატი"ფრიდომ ჰაუსის" ცენტრალურ ოფისში გასაგზავნად საგანგებო წერილს ამზადებს, რომელშიც ის გავლენიანი ორგანიზაციისგან აღნიშნულთან დაკავშირებით ახსნა-განმარტებას მოითხოვს.

შეგახსენებთ, რომ საერთაშორისო ორგანიზაცია "ფრიდომ ჰაუსმა" "უარესები უარესთა შორის" - ამ სახელწოდების მორიგი ყოველწლიური ანგარიში გამოაქვეყნა. ანგარიშში დასახელებულია 17 ქვეყანა და 3 ტერიტორია, სადაც ადამიანის უფლებების თვალსაზრისით განსაკუთრებით მძიმე მდგომარეობაა. აღნიშნულ ტერიტორიებს შორის საქართველოს ოკუპირებული ცხინვალი რეგიონიც მოხვდა. სამხრეთ ოსეთის თვითგამოცხადებული ტერიტორია, კიდევ ორ ტერიტორიასთან, ტიბეტთან და დასავლეთ საჰარასთან ერთად ერთიანდება ჯგუფში, სახელწოდებით "უარესები უარესთა შორის", რაც იმას ნიშნავს, რომ ადამიანის უფლებების დაცვის კუთხით იქ ყველაზე ცუდი სიტუაციაა. რაც შეეხება 17 ქვეყანას, რადიო „თავისუფლების" ინფორმაციით, მათ შორისაა ბირმა, ერითრეა, ლიბია, ჩრდილოეთ კორეა, სომალი. ყოფილი საბჭოთა კავშირის სივრცის ქვეყნებიდან სიაში მოხვდა მხოლოდ ბელორუსია, თურქმენეთი და უზბეკეთი. ქვეყნები შეფასებულია 2 კრიტერიუმის მიხედვით: პოლიტიკური უფლებები და სამოქალაქო თავისუფლებები.