ანგარიშის თანახმად, საქართველომ მეტი ძალისხმევა უნდა მოახმაროს დემოკრატიის განმტკიცებას ისეთ სფეროებში, როგორიცაა, პოლიტიკური ურთიერთობები და მედიაპლურალიზმი.

ამავე ანგარიშის მიხედვით, სხვა ძირითადი გამოვწვევებია ეროვნული უმცირესობების უფლებები და ინტეგრაცია, ბრძოლა კორუფციის წინააღმდეგ მაღალი რანგის თანამდებობის პირებს შორის, გაერთიანების თავისუფლების, შრომის უფლებების, დასაქმებისა და სოციალური პოლიტიკის გაძლიერება, სიღარიბის დაძლევა და სოფლის მეურნეობის განვითარება.

"2010 წელს საქართველომ მიაღწია წინსვლას ევროპის სამეზობლო პოლიტიკის სამოქმედო გეგმის პრიორიტეტების განახორციელებაში, განსაკუთრებით მართლმსაჯულების სისტემის რეფორმირებაში, არჩევნების ჩატარების
გაუმჯობესებაში, კონსტიტუციურ რეფორმაში, ქალთა უფლებებთან, ვაჭრობასა და ბიზნესთან დაკავშირებულ სფეროებში, რეგიონულ განვითარებასა და ადმინისტრაციული კორუფციის დაძლევაში. ერთ-ერთი მთავარი მიღწევა იყო ახალი სისხლის სამართლის საპროცესო კოდექსის ძალაში შესვლა 2010 წლის ოქტომბერში.
2011 წელს ამ ძალისხმევის გაგრძელებას და კანონმდებლობის ეფექტურ განხორციელებას გადამწყვეტი მნიშვნელობა ექნება ამ რეფორმებს გრძელვადიანი წარმატების უზრუნველსაყოფად", - აღნიშნულია ანგარიშში.

ევროკავშირი მიიჩნევს, რომ მოლაპარაკებები ევროკავშირსა და საქართველოს შორის ასოცირების შესახებ შეთანხმების თაობაზე დაიწყო 2010 წლის ივლისში და კარგი ტემპებით ვითარდებოდა.

შეაგხსენებთ, რომ 2011 წლის 26 მაისს ევროკომისიამ და ევროკავშირის უმაღლესმა წარმომადგენელმა საგარეო და უსაფრთხოების პოლიტიკის საკითხებში გამოაქვეყნეს ევროპის სამეზობლო პოლიტიკის ყოველწლიური "პაკეტი სამეზობლოსთვის", რომელშიც შედის: კომუნიკაცია განახლებული ევროპის სამეზობლო პოლიტიკის დაწყების შესახებ, 12 ანგარიში ევროპის სამეზობლო პოლიტიკის წევრ ქვეყნებში, მათ შორისსაქართველოში, მიღწეული ცვლილებების შესახებ, სექტორული ანგარიში და ანგარიში აღმოსავლეთ პარტნიორობის შესახებ.