სახალხო კრების აღმასრულებელი საბჭოს წევრის, ირაკლი ბათიაშვილის განცხადებით, ბადრი ბიწაძეს გირაო მხოლოდ იმისთვის შეუფარდეს, რომ გამოჩენილიყო.
"სრული მარაზმია ის, რასაც ხელისუფლება აკეთებს ბადრი ბიწაძის მიმართ. გირაო იმიტომ შეუფარდეს, რომ გამოჩენილიყო. ამ შეთითხნილი ბრალდებისთვის კი გირაოს არავინ გადაიხდის", - განაცხადა ბათიაშვილმა.
მისი ინფორმაციით, გუშინ საღამოს დააკავეს სახალხო კრების სამგორის რაიონული კომიტეტის თავმჯდომარე გია სალუქვაძე.
"სალუქვაძეს პოლიციელები დაესხნენ საკუთარ ეზოში თავს. ის არის დაშავებული. მისთვის წაყენებული ბრალი სრულიად უსაფუძვლოა და შეთითხნილია. სალუქვაძეს შეუფარდეს ბრალდება პოლიციისთვის წინააღმდეგობის გაწევის მუხლით. გრძელდება მასობრივი ტერორი სახალხო კრების მხარდამჭერებზე და ხელისუფლება ტერორისთვის ყველა მეთოდს იყენებს", - განაცხადა ბათიაშვილმა.
სახალხო კრების აღმასრულებელი საბჭოსა და იურისტებისა და საერთაშორისო ორგანიზაციების წარმომადგენლების შეხვედრა სასტუმრო ვერე პალასში გაიმართა.
