ყვარლის რაიონს ერთი თვეა ბუნებრივი აირი არ მიეწოდება. როგორც კახეთის საინფორმაციო ცენტრს ყვარლის მუნიციპალიტეტის გამგებლის მოადგილემ გია ცინცაძემ განუცხადა, ერთი თვის წინ ადიდებულმა ალაზანმა ბუნებრივი აირის ცენტრალური მაგისტრალი გაგლიჯა.
„ბუნებრივი აირის მიწოდების აღდგენა აქამდე იმიტომ ვერ მოხერხდა, რომ მილი წყალში გადიოდა და წყლის დონის დაკლებას ველოდებოდით. მაგისტრალი ბუნებრივი აირის სატრანსპორტო კომპანიას ეკუთვნის და კომპანიის წარმომადგენლებმა აღდგენითი სამუშაოები უკვე შეასრულეს. მილი გამოიცვალა და სპეციალურ საყრდენებზე დაიდო, რომ შემდეგში ასეთი პრობლემა აღარ შეიქმნას", - აღნიშნა გია ცინცაძემ. მისივე თქმით, ყვარლის რაიონს ბუნებრივი აირის მიწოდება მალე აღუდგება.
