1-ელ ივნისს, 16:00 საათზე, გლდანის უნარშეზღუდულ ბავშვთა სახლში არასამთვრობო ორგანიზაცია „ჩემი მწვანე ოცნება" გამართავს აქციას საერთაშორისო ბავშვთა დაცვის დღესთან დაკავშირებით.

აქციის ფარგლებში მრავალი საინტერესო ღონისძიება იგეგმება. ყველაფერი კი იმით დაიწყება, რომ ბავშვთა სახლის კალათბურთის გუნდთან სათამაშოდ მოვლენ საქართველოს კალათბურთის ნაკრების წევრი ანატოლი ბოისა და მისი თანაგუნდელები.
კალათბურთის მატჩის შემდეგ ბავშვებისთვის გაიმართება კონცერტი რომელშიც მონაწილეობას მიიღებენ მომღერლები შოთა ადამაშვილი, თეონა კოროშინაძე, მეგი გოგიტიძე და სხვები. კონცერტი ჩატარდება კედელთან, რომელიც სამხატვრო აკადემიის სტუდენტებმა სპეციალურად ამ დღისთვის მოხატეს. დღის განმავლობაში პატარებს თავის მუსიკით გაართობს DJ რემბო.

გარდა ამისა ჩატარდება მათი ნახატების გამოფენა. მეტი მხიარულების შესაქმნელად ეზოში მთელი აქციის განმავლობაში იქნებიან მულტფილმის გმირები და მოძრაობის თეატრის მსახიობები. ბავშვებს სახეს მოუხატავენ სამხატვრო აკადემიის სტუდენტები.

აქციის მხარდამჭერები არიან „ბილაინი", „მედიქლაბჯორჯია", „კაპაროლი" და „ნატახტარი".
ბავშვთა სახლში ამ ეტაპზე 123 პატარა ცხოვობს და მათთვის 1 ივნისს ერთი პატარა ოცნება ასრულდება.