დღეს, 1-ელ ივნისს, "ვისოლ ჯგუფი" ბავშვთა დაცვის საერთაშორისო დღეს რამდენიმე ღონისძიებით ქუთაისსა და თბილისში აღნიშნავს. 11:00 საათზე, "ვისოლი" საკუთარ ფიტნესცენტრ "ლაგუნაში" წითელი ჯვრის ორგანიზაციასთან ერთად ობოლი და მარჩენალდაკარგული 203 ბავშვისთვის ჯანსაღი ცხოვრების წამახალისებელ აქციას გამართავს. 12:00 საათზე კომპანიის წარმომადგენლები თბილისში მე-10 ინტეგრირებულ საჯარო სკოლასაც ეწვევიან და ხელმძღვანელობას ჯანმრთელობის პრობლემების მქონე ბავშვების ტრანსპორტირებისთვის საწვავს გადასცემენ. ამით შეზღუდული შესაძლებლობის მქონე ბავშვებს განათლების მიღებისა და საზოგადოებასთან ინტეგრაციის საშუალება მიეცემათ.
"იმისათვის, რომ პატარებმა ბავშვთა დაცვის საერთაშორისო დღე განსაკუთრებულად აღნიშნონ, ვისოლი თბილისსა და ქუთაისში რამდენიმე აქციას მართავს. "ლაგუნა ქუთაისის" ფიტნესცენტრში ბავშვებს შესაძლებლობა ექნებათ 1 დღე ჯანსაღ ცხოვრებას დაუთმონ, იცურონ აუზში, ივარჯიშონ აერობიკის დარბაზში, შეეჯიბრონ მხიარულ სტარტებსა და ასფალტზე ხატვაში. მხიარული კლოუნები ბავშვების მხიარულ განწყობაზე იზრუნებენ. აქციის ყველა მონაწილე ბავშვს წამახალისებელი საჩუქრები გადაეცემა", - აცხადებენ "ვისოლში".
