დღეს, 1-ელ ივნისს, ახალი ამბების სააგენტო "ჯი-ეიჩ-ენს" დაარსებიდან 6 წელი შეუსრულდა. სააგენტომ 2005 წლის 1-ელ ივნისს დაიწყო მუშაობა. 6 წლის განმავლობაში სააგენტომ მედიაბაზარზე დამოუკიდებელი და მიუკერძოებელი სახელის დამკვიდრება შეძლო. ამასთან, სააგენტო "ჯი-ეიჩ-ენი" საქართველოსა და შავიზღვისპირეთის ქვეყნების საინფორმაციო ბაზარზე ერთ-ერთი ლიდერის ადგილს იკავებს.
სააგენტოს დირექტორი გოჩა მირცხულავა ყველა თანამშრომელს ულოცავს სააგენტოს იუბილეს და მადლობას უხდის მკითხველს აღიარებისა და ერთგულებისთვის.
მისი თქმით, განვლილი ექვსი წელი არ იყო იოლი, თუმცა სააგენტომ შეძლო არა მხოლოდ თვითდამკვიდრება, არამედ საკმაოდ დიდი წარმატებებისთვის მიღწევა და ათასობით გულშემატკივრის შეძენა.
"განვლილი წლების განმავლობაში მრავალი ერთგული მკითხველი შევიძინეთ და მათთვის ინფორმაციის სანდო წყაროდ ვიქეცით. ჩვენი სალოგანიც - "ინფორმაციის შენი წყარო" - თითოეულ მკითხველზეა ორიენტირებული. ვსარგელობ შემთხვევით და სააგენტოს დაბადების დღეს ვულოცავ ყველა თანამშრომელს, რომლებსაც წლების განმავლობაში უმოღვაწიათ სააგენტოში, ასევე ჩვენს მკითხველსა და გულშემატკივარს", _ აცხადებს მირცხულავა.
"ჯი-ეიჩ-ენი" საზოგადოებას გადამოწმებული და ოპერატიული ინფორმაციით უზრუნველყოფს.
"ჯი-ეიჩ-ენი" "წლის ადამიანებისა და კომპანიების" გამოკითხვისა და "ოქროს პერგამენტის" დაჯილდოების ყოველწლიური ცერემონიალის ინიციატორი და ორგანიზატორია.
2008 წლის სექტემბერში ბულგარეთში გამართულ შავი ზღვის ქვეყნების საინფორმაციო სააგენტოების ასოციაციის მეორე ასამბლეაზე /BSENNA/ "ჯი-ეიჩ-ენი" ასოციაციის სრულუფლებიანი წევრი გახდა.
2010 წლის 4 მარტიდან "ჯი-ეიჩ-ენი" შავი ზღვის ქვეყნების ნაციონალური საინფორმაციო სააგენტოების ალიანსის თავმჯდომარე გახდა, ხოლო პრეზიდენტად ალიანსმა საინფორმაციო სააგენტო "ჯი-ეიჩ-ენის" გენერალური დირექტორი გოჩა მირცხულავა აირჩია.
"ჯი-ეიჩ-ენის" პარტნიორები არიან შემდეგი ნაციონალური სააგენტოები: АNА" (საბერძნეთი), "ANADOLU AGANSI" (თურქეთი), "არმენპრესი" (სომხეთი), "АТА" (ალბანეთი), "აზერტადჯი" (აზერბაიჯანი), "BTA" (ბულგარეთი), "იტარ-ტასი"(რუსეთი), "მოლდპრესი" (მოლდოვა), "აგერპრესი" (რუმინეთი), "ტანიუგი" (სერბეთი) და "უკრინფორმი" (უკრაინა), "HINA" (ხორვატია), "МIА" (მაკედონია).
1-ელ ივნისს დაბადების დღეს აღნიშნავს ასევე არაერთი საინფორმაციო საშუალება. "ჯი-ეიჩ-ენი" ულოცავს ყველა მათგანს და შემოქმედებით წარმატებებს უსურვებს.
