საქართველოს ექს-თავდაცვის მინისტრი ირაკლი ოქრუაშვილი რუსეთის "პირველ არხთან" საუბრისას ადასტურებს, რომ სააკაშვილის ნებართვით, საზღვრის გადაკვეთისას დერეფანი ეძლეოდა მოსკოვსა და ვოლდოგონსკში 1999 წლის სექტემბერში საცხოვრებელი სახლების აფეთქებაში ბრალდებულ - აჩიმეზ გოჩიაევს.

"ის რომ მას დერეფანი მიეცა არა ერთხელ არამედ ორჯერ - ამის თვითმხილველი პირადად მე ვარ. შს სამინისტრო იყო დაკავებული ამ საკითხის გადაწყვეტით და მას დაღესტნიდან თურქეთამდე უხსნიდნენ გზას. ერთხელ უკან დასაბრუნებლადაც მისცეს მას დერეფანი. ასე რომ ასეთი საკითხები მისი გვერდის ავლით არ წყდება", _ ამბობს ოქრუაშვილი.

კითხვაზე პასუხის გაცემისას, ხორციელდებოდა თუ არა რაიმე სახის ფინანსური დახმარება ჩეჩენი ბოევიკებისათვის ირაკლი ოქრუაშვილი პასუხობს, რომ მის დროს გამოყენებული იყო ბანკები მათთვის ფულის გადასარიცხავად.

"ჩემს დროს დგებოდა საკითხი, ჩვენი ბანკების გამოყენებისა ამ ფულის მისაღებად, ფული ჩეჩნეთში უნდა გადარიცხულიყო", _ განაცხადა ოქრუაშვილმა.

ამასთან ერთად, ამ გადაცემაში, ირაკლი ოქრუაშვილი ასევე აცხადებს, რომ მისი აზრით, ჩრდილოკავკასიის მაცხოვრებლებისათვის სავიზო რეჟიმის გაუქმება ასევე სპეციალური მიზნებისათვის მოხდა.

"რაც შეეხება დერეფნებს გარკვეული ადამიანებისათვის, რომლებიც საზღვარს გადადიან, ის რომ ცალმხრივად იქნა გაუქმებული სავიზო რეჟიმი ჩრდილო კავკასიის ქვეყნებისათვის, ეს არ იყო გაკეთებული იმისათვის, რომ ვინმე მოეზიდათ იქიდან ნორმალური ურთიერთობებისათვის. ეს იყო გაკეთებული იმისათვის, რომ ვიღაცას ყოველგვარი სავიზო რეჟიმისა და საპასპორტო კონტროლის გარეშე გაეარა", _ აცხადებს ირაკლი ოქრუაშვილი.

ამასთან ერთად, საქართველოს ექს-თავდაცვის მინისტრი, ფილმში "კავკაზ-2": მეტასტაზები" ასევე ეხება 2008 წლის აგვისტოში განვითარებულ მოვლენებს.

მისი თქმით, ომის გეგმებს მხარს უჭერდა აშშ-ს ექს-პრეზიდენტი ჯორჯ ბუში, რომელიც საქართველოს 2005 წელს სტუმრობდა.

"ის პირდაპირ გვეუბნებოდა ჩვენ: ბიჭებო, თუ თქვენ რამეს გეგმავთ როგორც ერთი ისე მეორე მიმართულებით - სამხრეთ ოსეთსა და აფხაზეთს ვგულისხმობ, გაითვალისწინეთ, რომ (მისი სიტყვები მომყავს) მე ჩემი ჯარით თქვენ ვერ დაგეხმარებით. ეს ყველამ გაიგო და ყველამ ჩაიწერა. გადის ერთი დღე, მოდის მეთიუ ბრაიზა, განვიხილეთ განხორციელებული ვიზიტი და ყველამ ბუშინ სიტყვები გაიხსენა. ის კი (მეთიუ ბრაიზა) ამბობს - მან განაცხადა, რომ თავის ჯარით ვერ დაგეხმარებათ, ის კი არ უთქვამს, რომ ამის გაკეთება არ ღირს", _ იხსენებს ირაკლი ოქრუაშვილი.
აღნიშნულ ფილმში, ირაკლი ოქრუაშვილი ასევე ეხება ჩერქეზების გენოციდის თემას და მიუთითებს, რომ "სააკაშვილი" ამ თემით თამაშობს, იმიტომ, რომ ეს ვიღაცას "მოსწონს".

"ის, რომ ჩეჩნეთი და არა მხოლოდ ჩეჩნეთი, არამედ კავკასიის სხვა ნაწილი რუსეთის სუსტი რგოლებია ეს ყველამ იცის. სააკაშვილი კი ცდილობს ამაზე ითამაშოს, იმიტომ, რომ ეს მავანთ "მოსწონთ". ისინი სანაცვლოდ რაღაც დახმარებას იღებენ", _ განაცხადა მან. მისივე თქმით, ჩერქეზების გენოციდის აღიარების ფაქტით ვიღაც მანიპულირებდა.

"ის, რომ 1,5 წლის განმაცლობაში ჩვენს პარლამენტში ჩერქეზების გენოციდის აღიარების განხილვა მიდიოდა, ეს რაღაცაზე მეტყველებს და ვიღაც მუდმივად მოახდენს ამ თემით მანიპულირებას", _ აცხადებს ირაკლი ოქრუაშვილი.