1-ლი ივლისიდან თურქეთ-საქართველოს საზღვრის გადაკვეთა პირადობის მოწმობითაც შესაძლებელია. საქართველოსა და თურქეთის მთავრობებს შორის დღეს გაფორმდა ხელშეკრულება, რაც საქართველოსა და თურქეთის მოქალაქეებს საშუალებას აძლებს თურქეთ-საქართველოს საზღვარი პასპორტის გარეშე გადაკვეთონ.
"ჩვენ ვაწერთ ხელს შეთანხმებას, რომლის მიხედვითაც მოქალაქეები საზღვარს პასპორტების გარეშე გადაკვეთენ, როგორც ჩვენ ეს ერთი წლის წინ ვთქვით. საზღვრის გადაკვეთა პასპორტების გარეშე ნიშნავს იმას, რომ ადამიანებისთვის ცხოვრება გაადვილდება. მანქანებიდან აღარ გადმოვლენ მძღოლები. მანქანდან გადასცემ პირადობის მოწმობას და გაგატარებენ, როგორც ეს არის ბევრ ქვეყანაში", - - განაცხადა საქართველოს პრეზიდენტმა.
მოდერნიზებული სარფის საბაჟო პუნქტი ოფიციალურად დღეს გაიხსნა. საბაჟო-გამშვები პუქნტის გახსნას, საქართველოს პრეზიდენტი და თურქეთის პრემიერ-მინისტრი რეჯებ ტაიპ ერდოღანი დაესწრენე. თურქეთის პრემიერ-მინისტრი ბათუმში სპეციალურად ამ ღონისძიებისთვის ჩამოფრინდა.
საქართველოს პრეზიდენტი ამბობს, რომ სარფის საბაჟო პუნქტი თანამედროვე სტანდარტებითაა აღჭურვილი. ახალ საბაჟო პუნქტზე მომსახურება და პროცედურები კიდევ უფრო გამარტივდება. საერთაშორისო სტანდარტებზე გათვლილ შენობაში არის მოსაცდელი დარბაზები და კაფეები. მებაჟეებს წუთში 10 მსუბუქი მანქანისა და 9 ტრაილერის მიღება შეეძლებათ, დღე-ღამეში კი ადგილზე დასაქმებულები 600-მდე სატრანსპორტო საშუალებას მოემსახურებიან.
შენობის კეთილმოწყობაში 16 მილიონი ლარი დაიხარჯა. ახალი ობიექტი გერმანელმა არქიტექტორმა-იურგენ მაიერმა დააპროექტა.
