საქართველოს პრეზიდენტის განკარგულებით „საზოგადოებრივი მაუწყებლის სამეურვეო საბჭოს წევრობის" ვაკანტური ადგილის დასაკავებლად ღია კონკურსი მეორედ გამოცხადდება.
როგორც პრეზიდენტის განკარგულებაშია ნათქვამი, ვაკანტური თანამდებობის დასაკავებლად გამოცხადებული ღია კონკურსის სამდივნოში კანდიდატების მიერ წარმოდგენილი სარეგისტრაციო დოკუმენტებით „არ დასტურდება მათი შესაბამისობა „მაუწყებლობის შესახებ" საქართველოს კანონით დადგენილ საკვალიფიკაციო მოთხოვნებთან, რის გამოც შეუძლებელია შესაბამისი გადაწყვეტილების მიღება".
აღნიშნულის გათვალისწინებით, 2011 წლის 1 ივნისიდან საზოგადოებრივი მაუწყებლის სამეურვეო საბჭოს წევრის (მეურვის) ერთი ვაკანტური თანამდებობის დასაკავებლად ახალი ღია კონკურსი გამოცხადდება.
კანდიდატურის დასახელების უფლება აქვს ყველას კონკურსის გამოცხადებიდან 30 დღის განმავლობაში - 30 ივნისის ჩათვლით.
სამეურვეო საბჭოს წევრის (მეურვის) კანდიდატი უნდა იყოს საზოგადოებრივი აღიარებისა და ნდობის მქონე პირი, უნდა ჰქონდეს უმაღლესი განათლება და არანაკლებ 5 წლის მუშაობის გამოცდილება.
