დღეს, 31 მაისს, 15:30 საათზე, სასტუმრო "რადისონში'' კოალიცია "მედიის ადვოკატირებისათვის'', რომელშიც გაერთიანებულია 11 ორგანიზაცია, აწყობს მრგვალ მაგიდას. შეხვედრაზე განხილული იქნება 2011 წლის 26 მაისს საპროტესტო აქციის გაშუქებისას ჟურნალისტებზე განხორციელებული ფიზიკური ძალადობის შემთხვევები.
მედიასაშუალებების წარმომადგენლებს, ადამიანის უფლებათა დამცველ არასამთავრობო ორგანიზაციებს, დიპლომატიურ კორპუსს, პოლიტიკური პარტიების წარმომადგენლებს, სახალხო დამცველს, იუსტიციის სამნისტროს, შინაგან საქმეთა სამინისტროსა და პარლამენტის წევრებს სტუდია "მონიტორი'' და "საქართველოს რეგიონულ მაუწყებელთა ასოციაცია'' წარმოუდგენენ 20-წუთიან ფილმს. ფილმში გადაღებული არიან ჟურნალისტები, რომლებზედაც 26 მაისის ღამეს ფიზიკური ძალადობა განხორციელდა. შეხვედრაზე დაზარალებული ჟურნალისტები თავიანთ ისტორიებს შეკრებილ საზოგადოებას მოუყვებიან. საქართველოს ახალგაზრდა იურისტთა ასოციაცია იურიდიულ შეფასებას მისცემს ჟურნალისტების მიერ აღწერილ ფაქტებს.
კოალიცია "მედიის ადვოკატირებისათვის'' სამოქალაქო საზოგადოების წარმომადგენლებს ხელმოსაწერად წარუდგენს საქართველოს შინაგან საქმეთა მინისტრის სახელზე შედგენილ წერილს, რომელიც მოუწოდებს ჟურნალისტური საქმიანობის პატივისცემისაკენ და მოითხოვს ჟურნალისტებზე განხორციელებული ფიზიკური ძალადობის ფაქტების გამოძიებასა და დაზიანებული პროფესიული აპარატურის კომპენსაციას.
