ახალი მემარჯვენეების ლიდერი დავით გამყრელიძე არ ეთანხმება "თავისუფალი დემოკრატების" მიერ გახმოვანებულ ინიციატივას, 26 მაისის მოვლენების საპარლამენტო გამოძიების შესახებ.
"ახალი მემარჯვენეები სკეპტიკურად ვართ განწყობილები საპარლამენტო გამოძიებებთან დაკავშირებით. ჩვენი მოსაზრებაა, რომ სახალხო დამცველთან შეიქმნას საზოგადოებრივი კომისია, რომელიც გამოიძიებს 26 მაისის მოვლენებს. სახალხო დამცველთან იმიტომ, რომ ბოლო პერიოდში ნათლად გამოჩნდა, რომ ის არის მიუკერძოებელი და დამოუკიდებელი პიროვნება", - განაცხადა გამყრელიძემ.
მან ასევე ისაუბრა საარჩევნო გარემოს გაუმჯობესებაზე ხელისუფლებასა და რვიანს შორის მიმდინარე მოლაპარაკებებზე.
გამყრელიძის თქმით, ამ მოლაპარაკებებზე და რვიანის მიერ ხელისუფლებისთვის შეთავაზებულ ვადაზე ამ ეტაპზე საუბარი არასერიოზულია.
"დღეს ჩვენი მთავარი სატკივარი არა საარჩევნო მოლაპარაკებები არამედ დაკავებულების და დაშავებულების ბედია. თუმცა ბოლო პერიოდში განვითარებულმა მოვლენებმა კიდევ ერთხელ ნათლად დაგვანახა რომ თავიდან უნდა მოვიგდოთ ის აზრი, რომ ხელისუფლება რევოლუციით უნდა შეიცვალოს. ხელისუფლების შესაცვლელად აუცილებელია დამოუკიდებელი და თავისუფალი არჩევნების ჩატარება და ხელისუფლების კონსტიტუციური გზით შეცვლა", - განაცხადა გამყრელიძემ.
