სერბეთი არ ახმაურებს სამხედრო დანაშაულში ბრალდებულ გენერალ რატკო მლადიჩის ჰააგაში ექსტრადიციის ზუსტ თარიღს. როგორც პროკურორის თანაშემწემ სამხედრო კრიმინალის საკითხებში ბრუნო ვეკარიჩიზმა განაცხადა, ინფორმაციის გასაიდუმლოება უსაფრთხოების ზომებთან არის დაკავშირებული.
მლადიჩი, რომელსაც ჰააგაში ტრიბუნალი გაასამართლებს ამჟამად იმყოფება ბელგრადში სპეციალურ იზოლატორში.
სერბეთის სასამართლომ მლადიჩის ექსტრადიციის გადაწყვეტილება 27 მაისს მიიღო. სავარაუდოდ ბრალდებულის მხარე 30 მაისს აპელაციას შეიტანს და გააპროტესტებს სასამართლოს გადაწყვეტილებას.
ოფიციალური პირების კომენტარებიდან გამომდინარე ყველა დარწმუნებულია, რომ აპელაცია არ დაკმაყოფილდება და მლადიჩი უახლოეს მომავალში ჰააგის ტრიბუნალის წინაშე წარდგება.
პროკურორის თანაშემწე ვეკარიზიჩმა ასევე განაცხადა რომ სასამართლო პალატას აპელაციის განსახილველად ვადა ერთიდან სამ დღემდე ექნება. განხილვას სამი დღე, რაც მაქსიმალური დროა, დაჭირდება იმ შემთხვევაში თუ აპელაცია გაგზავნილი იქნება ფოსტით, რაც სერბეთის კანონმდებლობით დაშვებულია.
