არაგვის ხეობაში კვლავაც გრძელდება უამინდობა, კერძოდ კი ხანგრძლივი კოკისპირულ;ი წვიმები, რაც მდინარე არაგვის ადიდებას იწვევს. ეს თავის მხრივ, პრობლემებს უქმნის „ჯორჯიან უოთერ ენდ ფაუერის" არაგვის ხეობაში განლაგებული სათავე ნაგებობების ფუნქციონირებას.
როგორც "ჯი-ეიჩ-ენს" „ჯორჯიან უოთერ ენდ ფაუერიდან" აცნობეს, თბილისის წყალმომარაგების უმნიშვნელოვანესი ობიექტები სწორედ არაგვის ხეობაშია განთავსებული და თბილისის გარკვეული ნაწილი სასმელი წყლით სწორედ აქედან მარაგდება.
არაგვის ადიდების გამო, კომპანია იძულებულია გარკვეულწილად შეზღუდოს წყლის მიწოდება არაგვის ხეობიდან, რათა არ დაუშვას წყალსადენის ქსელებში არასტანდარტული წყლის მოხვედრა. შექმნილი მდგომარეობა ძირითადად მტკვრის მარცხენა სანაპიროზე განთავსებულ დასახლებების წყალმომარაგებაზე აისახება. კომპანიის ტექნიკური ბრიგადები და სპეცტექნიკა უწყვეტ რეჟიმში მუშაობენ სიტუაციის ნორმალიზებისთვის.
ამ დროისთვის, ზემოთაღნიშნული მიზეზით, წყალმომარაგება შეფერხებით ხორციელდება:
• სოფ. გლდანში, გლდანულას, "კონიაკისა", "ცენტროლიტის", ავჭალისა და ზაჰესის დასახლებებში
• თემქის III მ/რაიონის ზედა კვარტლებში
• გლდანის ზედა მ/რორაიონებში
• სვანეთის უბნის ქვედა ნაწილში.
"ჯორჯიან უოთერ ენდ ფაუერი" ყოველ ღონეს ხმარობს აღნიშნულ დასახლებებს წყალმომარაგება მონაცვლეობით აღუდგინოს.
"ჯორჯიან უოთერ ენდ ფაუერი", ამინდის გამოსწორებასთან ერთად, აღნიშნული დასახლებების მაცხოვრებლებს ეტაპობრივად აღუდგენს წყალმომარაგებას.
