"დატყვევებული და ბორკილდადებული მომიტინგეების წინააღმდეგ გადამეტებული ძალის გამოყენებითა და განსაკუთრებული სისასტიკით განხორციელებული ძალადობა, რამაც გამოიწვია ადამიანების სიკვდილი, დაუსჯელი არ უნდა დარჩეს. საზოგადოებამ უნდა გაიგოს სიმართლე და დამნაშავეები უნდა დაისაჯონ. ცხადია, რომ ეს სადამსჯელო ოპერაცია არ განხორციელდებოდა სააკაშვილის პირადი ბრძანებისა და მერაბიშვილის უშუალო ხელმძღვანელობის გარეშე. ამას უნდა მიეცეს პოლიტიკური და სამართლებრივი შეფასება. ამიტომ დაუყოვნებლივ უნდა შეიქმნას საპარლამენტო საგამოძიებო კომისია. კომისიაში მიწვეულ უნდა იყვნენ დამოუკიდებელი ექსპერტები და ის პიროვნებები, რომელთა რეპუტაცია საზოგადოებაში ეჭვს არ იწვევს. ჭეშმარიტების დადგენაში გადამწყვეტი მნიშვნელობა სამოქალაქო საზოგადოების აქტიურობას ენიჭება. უნდა შევქმნათ ერთიანი სამოქალაქო ფრონტი, რომელიც სამართლიანი სახელმწიფოს შექმნისთვის მებრძოლ ყველა პროფესიისა და ეროვნების ადამიანს გაგვაერთიანებს", - აღნიშნულია განცხადებაში.

„თავისუფალი დემოკრატები" მიიჩნევენ, რომ სააკაშვილის და მერაბიშვილის ხელისუფლებამ სანდრო გირგვლიანის მკველობის შემდეგ ადამიანების წამებას სისტემური ხასიათი მისცა და მომიტინგეების წინააღმდეგ მოქმედების არსენალშიც დაამკვიდრა.

„აგრესიასთან შეგუება, დამნაშავის დაუსჯელად დატოვება ნიშნავს საზოგადოებამ უარი ვთქვათ ღირსებაზე. ჩვენ უნდა ვიყოთ კანონმორჩილი, მაგრამ არა მოძალადე ხელისუფლის მოშიში საზოგადოება. გუშინდელ სამოქალაქო საზოგადოების აქციაზე ათასობით ადამიანის მიერ გამოხატულმა პროტესტმა ძალადობის წინააღმდეგ დაგვარწმუნა, რომ ქართველი ერი უსამართლობას არ ეგუება და ღირსებას არ დათმობს", - აცხადებს პარტია "თავისუფალი დემოკრატები".