ოს სეპარატისტთა ლიდერი ედუარდ კოკოითი ღრმა მწუხარებას გამოთქვამს აფხაზ სეპარატისტთა ლიდერის სერგეი ბაღაფშის გარდაცვალების გამო. განცხადება ამის შესახებ ოს სეპარატისტთა ლიდერის ე.წ. პრესსამსახურის ხელმძღვანელმა ვიაჩესლავ სედოვმა გააკეთა.
მისი თქმით, სერგეი ბაღაფში და ედუარდ კოკოითი "თავიანთი რესპუბლიკების დამოუკიდებლობისათვის ბრძოლას ერთად ედგნენ სათავეში".
"ამ მძიმე წუთებში სამხრეთ ოსეთის მოსახლეობა მოძმე აფხაზი ერის გვერდით დგას და მათთან ერთად გლოვობს. დანაკარგი შეუვსებელია. იმედს ვიტოვებთ, რომ აფხაზი ხალხი გაუძლებს ამ გამოცდას და გააგრძელებს დამოუკიდებელი სახელმწიფოს მშენებლობას, რისთვისაც იღწვოდა სერგეი ბაღაფში", _ ნათქვამია კოკოითის სამძიმრის წერილში, რომელიც სედოვმა წაიკითხა.
შეგახსენებთ, რომ აფხაზ სეპარატისტთა ლიდერი სერგეი ბაღაფში ამ დილით მოსკოვის ერთ-ერთ კლინიკაში 63 წლის ასაკში სიმსივნის დიაგნოზით გარდაიცვალა. მის ნაცვლად, სამი თვის განმავლობაში აფხაზეთის ე.წ. პრეზიდენტის მოვალებას ე.წ. ვიცე-პრეზიდენტი ალექსანდრე ანქვაბი შეასრულებს.
მასალის გამოყენების პირობები
