საქართველოს არასამთავრობო ორგანიზაციები ევროკავშირის ელჩს, ევროპის საბჭოს, დიპლომატიურ კორპუსსა და საერთაშორისო უფლებადამცველ ორგანიზაციებს მიმართვას უგზავნიან.
მიმართვის ტექსტი დღეს საზოგადოებას თავად უფლებადამცველებმა, მათი ორგანიზებით, რუსთაველის ძეგლთან გამართულ საპროტესტო აქციაზე გააცნეს.
„2011 წლის 26 მაისს ხელისუფლებამ სასტიკი ანგარიშსწორება მოუწყო მშვიდობიან მომიტინგეებს, დაარბია აქცია და ფიზიკურად გაუსწორდა განსხვავებული აზრის მქონე ადამიანებს. უფლებადამცველები მომხდარს ვაფასებთ, როგორც სასტიკ სადამსჯელო, უკანონო ღონისძიებას საკუთარი მოქალაქეების მიმართ, ვინც არ უჭერს მხარს საქართველოს ძალადობრივ რეჟიმს", - ნათქვამია მიმართვაში.
მასში ასევე აღნიშნულია, რომ ბრძანების გამცემმა და შემსრულებელმა პირებმა დაარღვიეს საქართველოს კონსტიტუცია და სისხლის სამართლის კოდექსი.
„იკვეთება სისხლის სამართლის კოდექსის 333, 143, 144(3), 147 და 154 მუხლებით გათვალისწინებული დანაშაულის ჩადენა სპეცოპერაციის დამგეგმავი და მონაწილე პირების ქმედებაში, რაც გულისხმობს სამსახურებრივი უფლებამოსილების გადამეტევას, თავისუფლების უკანონო აღკვეთას სიცოცხლისა და ჯანმრთელობისთვის საშიში ძალადობით, განზრახ უკანონო დაკაებას და ჟურნალისტების საქმიანობაში უკანონოდ ხელშეშლას. ჩვენ, უფლებადამცველები ვგმობთ ხელისუფლების ძალადობას საკუთარი მოქალაქეების მიმართ და მოვითხოვთ: 1. შეაჩერეთ მასობრივი რეპრესიები და ანგარიშსწორებები, უკანონო დაპატიმრებები უდანაშაულო ადამიანების მიმართ. 2. შეიქმნას საგამოძიებო კომისია საზოგადოების მიუკერძოებელი და კომპეტენტური სპეციალისტების მონაწილეობით. ობიექტური გამოძიების შედეგად დაისაჯოს ყველა პირი, ვინც გასცა 26 მაისს უკანონო ბრძანება და ვინც ჩაიდინა დანაშაული. 3. პირადად თქვენი წარმომადგენლები შეხვდეთ და მოინახულოთ დაკავებული პირები, რათა თავად დარწმუნდეთ როგორ მდგომარეობაში არიან ისინი. 4 დადგინდეს გაუჩინარებულ პირთა ადგილსამყოფელი", - აღნიშნულია საქართველოში მოქმედ 50-მდე არასამთავრობო ორგანიზაციის ერთობლივ განცხადებაში.
