„საქართველოს გზის" ექს-ლიდერის, პოლიტიკიდან დროებით წასული სალომე ზურაბიშვილის შეფასებით, საქართველოში საბჭოთა ტოტალიტარიზმის სუნი ბრუნდება.
ქვეყანაში მიმდინარე მოვლენებს ზურაბიშვილი „ტრაგედიად" მიიჩნევს და მას ამერიკის შეერთებული შტატებიდან აფასებს.
„მძიმე დღეები დაუდგა საქართველოს, სამარცხვინო დღეები! როცა მთელ მსოფლიოში მოდის დემოკრატიის ტალღა, ჩვენთან პირიქით, საბჭოთა ტოტალიტარიზმის სუნი ბრუნდება", - მიიჩნევს სალომე ზურაბიშვილი.
ამასთან, საგარეო საქმეთა ყოფილი მინისტრის შეფასებით, რაც 26 მაისის ღამეს, რუსთაველზე მოხდა, ერის შეურაცხყოფა იყო.
„ეს იყო ერის შეურაცხყოფა, რომ არაფერი არ ვთქვა იმ ადამიანებზე, ვისაც იმ ადგილას მედლები დაიკიდეს! აქ ლაპარაკი არ არის ბურჯანაძის შეცდომებზე თუ მცდარ ამბიციებზე, არც ვიღაცეების გაუგებარ პოლიტიკაზე თუ თამაშებზე ( რაზეც ალბათ ბევრი კითხვები ჩნდება)", - ამბობს ზურაბიშვილი.
მისივე აზრით, „დუმილით, სიდინჯით და მტკიცედ უნდა შეხვდეს ქვეყანა ამ ახალ განსაცდელს".
„ყველაფერი ახლა იწყება, ამათ რომ ჰგონიათ დამთავრდა", - დასძენს ქართული პოლიტიკიდან დროებით წასული სალომე ზურაბიშვილი.
