შინაგან საქმეთა სამინისტრო 26 მაისს, აღლუმის მიმდინარეობისას ანსამბლ „სუხიშვილების" მოცეკვავის დაკავებას კატეგორიულად უარყოფს.
„რა სისულელეა. მსგავსი რამ არ მომხდარა", - განუცხადა „ჯი-ეიჩ-ენს" უწყების საინფორმაციო-ანალიტიკური დეპარტამენტის უფროსმა შოთა უტიაშვილმა.
აღნიშნული ინფორმაცია „ჯი-ეიჩ-ენს" არ დაუდასტურეს არც პრეზიდენტის ადმინისტრაციაში და განაცხადეს, რომ ცეკვა „ხორუმი" აღლუმზე პირადად პრეზიდენტის გადაწყვეტილებით აღარ შესრულდა.
შეგახსენებთ, რომ საზეიმო აღლუმზე სამხედრო ფორმაში გამოწყობილ „სუხიშვილებს" საბრძოლო ცეკვა „ხორუმი" უნდა შეესრულებინათ, თუმცა ის არ შესრულებულა.
როგორც იმავე დღეს თავდაცვის სამინისტროში განაცხადეს, ამის მიზეზი 26 მაისის ღამეს, პარლამენტთან მიმდინარე არასანქცირებული მიტინგის დაშლის შედეგად ორი ადამიანის გარდაცვალება გახდა, თუმცა სოციალურ ქსელში გავრცელებული ინფორმაციით, „ხორუმის" შესრულებაზე უარი თავად ანსამბლის ერთ-ერთმა მოცეკვავემ განაცხადა, რის გამოც ის ადგილზევე დააკავეს.
არსებობს ფოტოც, რომელზეც ჩანს, როგორ გაჰყავს სამხედრო ფორმაში გამოწყობილი მოცეკვავზე პარლამენტის შენობის წინა ტერიტორიიდან ორ სამოქალაქო ფორმაში ჩაცმულ პირს.
