არასამთავრობო ორგანიზაცია „თავისუფლების ცენტრის" მტკიცებით, 26 მაისის ღამეს თბილისის პროზექტურაში ვლადიმერ მასურაშვილის სახელის და გვარის ადამიანი არ მიუყვანიათ.
როგორც „ჯი-ეიჩ-ენს" ცენტრის ხელმძღვანელმა ეკა ჯიხვაშვილმა განუცხადა, მან შსს-ის მიერ პოლიციელის გარდაცვალების შესახებ გავრცელებული ინფორმაცია პროზექტურაში თავად გადაამოწმა.
„პროზექტურაში მითხრეს, რომ 26 მაისის ღამეს, აქციის დარბევის შედეგად იქ რუსთაველის გამზირიდან მიყვანილ იქნა ორი ცხედარი: ცხადაძისა და მოსულიშვილის", - განმარტა „თავისუფლების ცენტრის" ხელმძღვანელმა.
მისივე მტკიცებით, პოლიციელი ვლადიმერ მასურაშვილი, რომელიც შსს-ის ინფორმაციით, აქციის დარბევის ღამეს, ბადრი ბიწაძის ესკორტის მანქანამ იმსხვერპლა, ამ დროისთვის ე.წ. არამიანცის კლინიკის რეანიმაციულ განყოფილებაში იმყოფება.
„მართალია მასურაშვილი მძიმედაა და ის რეანიმაციულ განყოფილებაში მკურნალობს, მაგრამ „ცოცხლად" ირიცხება", - აღნიშნა მან.
შეგახსენებთ, რომ ცენტრმა დღეს მომიტინგეთა არასანქცირებული მიტინგის დარბევისას დაშავებულ ადამიანთა სია და იმ საავადმყოფოთა ჩამონათვალი გამოაქვეყნა, სადაც ისინი მკურნალობას გადიან. მათ შორის ვლადიმერ მასურაშვილის სახელი და გვარიც მოხვდა, რომელიც შსს-ის ინფორმაციით, შემთხვევის ადგილზევე გარდაიცვალა.
