დღეს, 27 მაისს, 18:00 საათზე ივანე ჯავახიშვილის სახელობის თბილისის სახელმწიფო უნივერსიტეტს ლეიდენის (ჰოლანდია) უნივერსიტეტის დელეგაცია ეწვევა. დელეგაციას ლეიდენის უნივერსიტეტის ჰუმანიტარულ მეცნიერებათა ფაკულტეტის დეკანი ვიმ ვან დენ დოელი უხელმძღვანელებს. დელეგაციის წევრები შეხვედრებს თსუ-ის ექვსივე ფაკულტეტის დეკანთან გამართავენ. ვიზიტის ფარგლებში ხელი 3 დოკუმენტს მოეწერება.
განზრახულობათა ოქმი, ურთიერთგაგების მემორანდუმი და ხელშეკრულება სტუდენტთა გაცვლის შესახებ ორ უმაღლეს სასწავლებელს შორის მჭიდრო თანამშრომლობას უზრუნველყოფს. ხელშეკრულებებს ხელს თსუ რექტორი ალექსანდრე კვიტაშვილი და ლეიდენის უნივერსიტეტის ჰუმანიტარულ მეცნიერებათა ფაკულტეტის დეკანი ვიმ ვან დენ დოელი მოაწერენ.
ლეიდენი დიდი ტრადიციების მქონე, 435 წლის უნივერსიტეტია. თსუ-ის რექტორი 2011 წლის იანვრის თვეში ლეიდენის უნივერსიტეტში ვიზიტით იმყოფებოდა. შეხვედრისას უნივერსიტეტის წარმომადგენლებმა სამომავლო თანამშრომლობის გეგმები დასახეს. ლეიდენის უნივერსიტეტის წარმომადგენლები დაინტერესებული არიან გაცვლითი პროგრამებით ქართველოლოგიასა და არქეოლოგიაში.
ლეიდენის უნივერსიტეტის დელეგაციის ვიზიტი 30 მაისის ჩათვლით გასტანს.
