ადვოკატ ქეთი ბექაურის ინფორმაციით, თბილისის სასამართლოები უკვე მეორე დღეა აღარ მუშაობენ.
როგორც ბექაურმა „ჯი-ეიჩ-ენს" განუცხადა, შესაძლოა, აღნიშნული დედაქალაქში მიმდინარე საპროტესტო აქციებს უნდა უკავშირდებოდეს.
„თბილისის სასამართლოები ორი დღეა პარალიზებულია. იმის გამო, რომ პროცესებზე აღარ მოჰყავთ განსასჯელები, სხდომები აღარ იმართება და ამის შესახებ, თავად სააპელაციო სასამართლოს მოსამართლე მზია ლომთათიძემ განაცხადა. ჩემი აზრით, პატიმრების სასამართლოებში მიყვანას აქციების გამო ერიდებიან, ეს კი მართლმსაჯულების პროცესს ბლოკირებულს ხდის, რაც დაუშვებელია. ხელისუფლებას არ აქვს უფლება სასამართლოს მუშაობაში ჩაერიოს, რა სიტუაციას არ უნდა იყოს ქვეყანაში", - განუცხადა ბექაურმა „ჯი-ეიჩ-ენს".
მისივე განმარტებით, სწორედ იმის გამო, რომ დღეს დაგეგმილ პროცესზე მისი დაცვის ქვეშ მყოფის, ცოტნე გამსახურდიას მიყვანა არ მომხდარა, სააპელაციო სასამართლოში ჩანიშნული სხდომა 8 ივნისამდე გადაიდო.
„საბადრაგო სამსახურს არ წარმოუდგენია არავითარი ოქმი იმის თაობაზე, თუ რატომ არ მოხდა სასამართლოში ცოტე გამსახურდიას მიყვანა. მოსამართლეებს, მზია ლომთათიძესა და გიორგი ჩემიას ჰქონდათ სხდომის განსასჯელის დასწრების გარეშე ჩატარების მცდელობა, რისი უფლებაც ჩვენ არ მივეცით", - აღნიშნა ადვოკატმა.
