დღეს, აშშ-ის ელჩის მოადგილე კენტ ლოგსდონი პრიზებსა და სერტიფიკატებს გადასცემს იმ 12 მოსწავლეს, რომელთაც გაიმარჯვეს ესეების კონკურსში თემაზე "ნაფიც მსაჯულთა სასამართლო: შენ წყვეტ." აშშ-ის საელჩოსთან ერთად, კონკურსის თანაორგანიზატორები არიან საქართველოს მთავარი პროკურატურა და იუსტიციის სასწავლო ცენტრი. 12 გამარჯვებული ნამუშევარი საკონკურსოდ წარდგენილი 150 ესედან შეირჩა.
როგორც "ჯი-ეიჩ-ენს" საქართველოში აშშ-ის საელჩოდან აცნობეს, დღის განმავლობაში, კონკურსში გამარჯვებული სტუდენტები იუსტიციის სასწავლო ცენტრში ნაფიც მსაჯულთა ინსცენირებულ სასამართლო პროცესში მიიღებენ მონაწილეობას და თბილისის საქალაქო სასამართლოს ეწვევიან. დღის ბოლოს სტუდენტებს აშშ-ის საელჩოში უმასპინძლებენ. მათ გადაეცემათ სერთიფიკატები. საუნივერსიტეტო და სასკოლო ასაკობრივ კატეგორიებში, სამ-სამი საუკეთესო ესეს ავტორი კი აშშ-ის იუსტიციის დეპარტამენტის მიერ დაწესებული ჯილდოებით: ლეპტოპებით, აიპოდებითა და ციფრული ფოტოკამერებით დაჯილდოვდება. გამარჯვებული ესეები აშშ-ის საელჩოს ვებგვერდზე განთავსდება.