"ნებისმიერი დაყრდნობა სამხედრო ძალაზე და მით უფრო უცხო ქვეყნის სამხედრო ძალაზე ჩვენთვის კატეგორიულად მიუღებელია - ეს ღალატის ტოლფასია", - განაცხადა "სახალხო კრების" ერთ-ერთმა ლიდერმა ნინო ბურჯანაძემ "რია ნოვოსტოს" თბილისის ოფისში გამართულ პრესკონფერენციაზე ვიცე-პრემიერ გიორგი ბარამიძის მიერ გაკეთებული განცხადების კომენტირებისას. ბარამიიძის განცხადებით, სავარაუდოდ, ოპოზიცია ქვეყანაში ამბოხების პროვოცირებას რუსული საოკუპაციო ჯარების "მეგობრული დახმარების" იმედით აპირებს.
ბურჯანაძე ასევე აცხადებს, რომ თუ ქართულ სპეცსამსახურებს ამის შესახებ რაიმე სახის ინფორმაცია მოეპოვებათ და იციან, რომ ვინმეს უცხო ქვეყნის სამხედრო ძალაზე აქვს გათვლა გაკეთებული, ასეთი ადამიანები უნდა დააპატიმრონ.
"ბარამიძე ამ განცხადების გაკეთებით კარგად ჩაეწერა ხელისუფლების შავ პიარში. თუ საქართველოს სპეცსამსახურებს აქვთ მსგავსი ინფორმაცია იმის შესახებ, რომ საქართველოში არსებობს პოლიტიკური პარტია ან გაერთიანება, რომელსაც უცხო ქვეყნის სამხედრო ძალაზე აქვს გათვლა, ასეთი პარტიები უნდა გამოავლინონ და დააპატიმრონ, მაგრამ ვიდრე ამას გააკეთებდნენ, ყოველივე ეს დოკუმენტურად უნდა იყოს დადასტურებული - წინააღმდეგ შემთხვევაში, ყველაფერი შავი პიარის დონეზე დარჩება", _ აცხადებს ბურჯანაძე.
