საქართველოს ვიცე პრემიერ-მინისტრმა გიორგი ბარამიძემ ევროკავშირის შავი ზღვის აუზის საზღვრისპირა თანამშრომლობის პროგრამის პირველი კონკურსის გამარჯვებულებს პროგრამაში აქტიური მონაწილეობისათვის სიგელები გადასცა.
როგორც „ჯი-ეიჩ-ენს" ბარამიძის აპარატიდან აცნობეს, სიგელები ჩოხატაურის საკრებულოს, ილია ჭავჭავაძის სახელობის სახელმწიფო უნივერსიტეტს, საქართველოს ხელოვნებისა და კულტურის ცენტრს, ქუთაისის საინფორმაციო ცენტრს, შავი ზღვის ეკო-აკადემიას, წყლის ეკოლოგიისა და თევზის მეურნეობის ინსტიტუტს, გიორგი ჩუბინიშვილის სახელობის ქართული ხელოვნების ისტორიისა და ძეგლთა დაცვის კვლევის ეროვნულ ცენტრს გადაეცა.
შავი ზღვის აუზის საზღვრისპირა თანამშრომლობის პროგრამა - EU Black Sea Cross Border Cooperation - ევროკავშირის სამეზობლო და პარტნიორობის ინსტრუმენტის (ENPI) ფარგლებში ხორციელდება და მიზნად ისახავს შავი ზღვის აუზის ქვეყნებს შორის თანამშრომლობის ხელშეწყობას ერთობლივი, რეგიონალური პროექტების განხორციელების საშუალებით. პროგრამა რვა მონაწილე ქვეყანას (საქართველო, რუმინეთი, ბულგარეთი, საბერძნეთი, უკრაინა, მოლდოვა, თურქეთი, სომხეთი) აერთიანებს და მისი ბიუჯეტი 2007-2013 წლებისათვის 24 მილიონი ევროა.
პროგრამა ითვალისწინებს შავი ზღვის რეგიონში მოქმედი არასამთავრობო სექტორის, ადგილობრივი თვითმმართველობის ორგანოების, მუნიციპალიტეტების, სახელმწიფო უნივერსიტეტებისა და სამეცნიერო კვლევითი ინსტიტუტების დონეზე თანამშრომლობის ხელშეწყობასა და ერთობლივი რეგიონალური ინიციატივების მხარდაჭერას.
