საპარლამენტო უმრავლესობის ერთ-ერთი ლიდერის გოკა გაბაშვილის შეფასებით, სიტყვის თავისუფლება ხელკეტების თავისუფლად ქნევას არ ნიშნავს.
ამის შესახებ გაბაშვილმა სახალხო კრების აქციების შეფასებისას განაცხადა.
"არანაირ ახალ კომენტარს ეს სიტუაცია არ იმსახურებს. გარდა იმისა, რომელსაც დიდი ხანია ვაკეთებთ. ჩვენთვის მნიშვნელოვანია, რომ იყოს დემოკრატია, კანონის ფარგლებში ნებისმიერ ადამიანს ჰქონდეს საშუალება თავისი აზრის თავისუფლად გამოხატვის. თუმცა, თუ ვინმე დაარღვევს კანონს, მას ისევე როგორ, ყოველ დემოკრატიულ ქვეყანაში, კანონითვე გაეცემა პასუხი", - აღნიშნა გაბაშვილმა.
მისივე შეფასებით, ეს არის ანბანური ჭეშმარიტება, რომელიც მუშაობს და მოქმედებს ნებისმიერ ქვეყანაში და ასევე იმუშავებს საქართველოშიც.
"თუ ვინმეს უნდა მუდმივ პირდაპირ ეთერში და ამას მუდმივად ითხოვოს, ეს მისი საქმეა და მისი შეხედულებების. ისიც უცნაურია, რომ ვიღაცას სიტყვის თავისუფლება ხელკეტების ქნევის თავისუფლება ჰგონია, მაგრამ სიტყვის თავისუფლება ყველას შეუძლია გამოიყენოს, მაგრამ ეს უნდა ჩაჯდეს კანონის ფარგლებში", - აღნიშნა გაბაშვილმა.
ამასთან, საპარლამენტო უმრავლესობა საპროტესტო აქციების უცხოურ მედიაში ობიექტურად გაშუქებით კმაყოფილია და როგორც გაბაშვილი აღნიშნავს, სიტუაციაც, ვითარებაც, რაოდენობაც ადეკვატურად არის ასახული.
