"ქართული პარტიის" ინფორმაციით, პარტიის ოფისიდან გასული ორი ავტომანქანა საპატრულო სამსახურის თანამშრომლებმა ელბაქიძის აღმართზე უმიზეზოდ გააჩერეს. ამ ფაქტს პარტიის პოლიტიკური მდივანი ეროსი კიწმარიშვილი შეესწრო, რომელსაც პოლიციელებმა მანქანების გაჩერების მიზეზი ვერ განუმარტეს. რამდენიმე წუთის შემდეგ, საპატრულო პოლიციის თანამშრომლები იძულებულები გახდნენ, უმიზეზოდ გაჩერებული ავტომობილების მძღოლებისთვის გზის გაგრძელების უფლება მიეცათ.
„პოლიციელი ტელეფონზე რეკავდა, სანამ თავისი ხელმძღვანელობისგან ინსტრუქცია არ მიიღო. აი, ამას უკეთებენ საპატრულოს თანამშრომლებს მათი უფროსები. ასეთ დღეში აგდებენ ქართულ პოლიციას ვანო მერაბიშვილი და მისი დამქაშები. ეს უმსაგვსობა უნდა დამთავრდეს. სამართალდამცავებს უნდა დავუბრუნოთ ღირსება", - ასეთი კომენტარი გააკეთა შემთხვევის ადგილზე ეროსი კიწმარიშვილმა.