თბილისელ სომეხთა ასამბლეა აფხაზეთისა და ცხინვალის აღიარებისთვის "რუსეთის სომეხთა კავშირის" მიერ 90 მილიონი დოლარის გამოყოფის შესახებ სააგენტო REGNUM -ის მიერ გამოქვეყნებულ სტატიასან დაკავშირებით აღშფოთებას გამოთქვამს.
"აღნიშნული ინფორმაცია გავრცელდა საქართველოს ტელევიზიის მრავალ არხზე, რამაც დიდი რეზონანსი გამოიწვია, როგორც საქართველოს სომეხთა სათვისტომოს შორის, ასევე სრულიად საქართველოს საზოგადოებაში. თბილისელ სომეხთა ასამბლეის წარმომადგენლები რუსეთის სომეხთა კავშირის ხელმძღვანელობასთან დაახლოებულ კომპეტენტურ წყაროს დაუკავშრიდნენ, რომელმაც გვაცნობა, რომ გავრცელებული ინფორმაცია არ შეესაბამება სინამდვილეს და დააფიქსირა რუსეთის სომეხთა კავშირის პოზიცია, რომ არც ერთი დოლარი არ დაიხარჯება მთიანი ყარაბაღის დამოუკიდებლობის ცნობისადმი მიმართული საქმიანობის გარდა", - ამის შესახებ "ჯი-ეიჩ-ენს" თბილისელ სომეხთა ასამბლეიდან აცნობეს.
თბილისელ სომეხთა ასამბლეის შეფასებით, REGNUM -ის მიერ გავრცელებული ინფორმაცია საქართველო-სომხეთის მრავალსაუკუნოვანი მეზობლური ურთიერთობების დესტაბილიზაციისკენ მიმართულ მორიგ მცდელობას წარმოადგენს.
"მსგავსი ქმედეებები განსაკუთრებულ ეჭვს ბადებს, უახლოეს მომავალში სრულიად საქართველოს კათალიკოს-პატრიარქ ილია II-სთან სრულიად სომხეთის კათალიკოს გარეგინ II-ის შესაძლო ოფიციალური ვიზიტის გამო. ჩვენი ორგანიზაცია სისტემატურად ატარებს მონიტორინგს მასმედიის მიერ სომხური სათვისტომოების შესახებ გავრცელებულ ინფორმაციებთან დაკავშირებით, შეძლებისდაგვარად წინ აღვუდგებით ზოგიერთი საინფორმაციო სააგენტოს მიერ სიძულვილის ენისა და ეთნოსთაშორისი შუღლის გაღვივებისადმი ყველა მცდელობას", - აღნიშნულის თბილისელ სომეხთა ასამბლეის განცხადებაში.
