"სახალო კრება" სახელმწიფო მოხეელებს მიმართვას უგზავნის.
"დღეს ქვეყანაში არსებულ ვითარებაში ბევრია დამოკიდებული თითოეული ადამიანის სწორ გადაწყვეტილებაზე. პირდაპირი დემოკრატია, რომლისკენაც მოვუწოდებთ საზოგადოებას, არსებული ხელისუფლების არაადეკვატურობისა და უპასუხისმგებლობის გათვალისწინებით, ერთადერთი გამოსავალია ქვეყნის გადასარჩენად. სახელმწიფო დაწესებულებებში დასაქმებული უამრავი ადამიანი, უმეტეს შემთხვევაში, აცნობიერებს რეალურ ვითარებას. ამისდა მიუხედავად, ისინი პატიოსნად განაგრძნობენ მოვალეობის შესრულებას - თვლიან რა, რომ ემსახურებიან ქვეყანას და არა სააკაშვილის რეჟიმს. მოგმართავთ ყველა იმ ადამიანს, სპეციალისტს, პროფესიონალს, ექსპერტს, რომლებზედაც დამოკიდებულია ქვეყნის განვითარების პერსპექტივა და ბედი, მოგმართავთ სახელმწიფო მოხელეებს -შემოგვიერთდით! დადექით ხალხის გვერდით! ემსახურეთ მხოლოდ ხალხს და არა პრეზიდენტ სააკაშვილის დამნაშავე რეჟიმს", - ნათქვამია მიმართვაში.
მასში აღნიშნულია, რომ "სახალხო კრების" პრინციპია, ყველა პროფესიონალი და პატრიოტი დარჩეს საქართველოს სამსახურში, მისი პოლიტიკური სიმპათიის მიუხედავად.
"მხოლოდ დანაშაულში ჩართულ მოხელეებს უნდა მოეთხოვოს პასუხი ჩადენილი დანაშაულისთვის. საქართველოში აღარასოდეს აღარ უნდა იყოს დამოკიდებული სახელმწიფო მოხელეთა შერჩევა მონურ ერთგულებაზე, ან პარტიულ კუთვნილებაზე. მომავალი ხელისუფლებისთვის ერთადერთი კრიტერიუმი პროფესიონალიზმი, პატიოსნება და სამშობლოს სამსახური უნდა გახდეს. ვიცით, რომ თქვენი უმეტესობა ამ კრიტერიუმებს დაკმაყოფილებს", - აღნიშნულია სახელმწიფო მოხელეებისადმი გაგზავნილ მიმართვაში.
