დღეს, 20 მაისს, 12:00 სთ., თბილისში, კულტურის ცენტრ „მუზაში", სპორტისა და ახალგაზრდობის საქმეთა მინისტრი - ლადო ვარძელაშვილი პროგრამის „პატრიოტი 2011" ახლად შერჩეულ ლიდერებს შეხვდება.
როგორც "ჯი-ეიჩ-ენს" სპორტისა და ახალგაზრდობის საქმეთა სამინისტროდან აცნობეს, შეხვედრაზე მინისტრი „პატრიოტში" განხორციელებულ ცვლილებებზე, საერთაშორისო ბანაკში მონაწილეთა შერჩევის პრინციპებსა და ლიდერების როლზე ისაუბრებს.
ლიდერებთან შეხვედრაზე, სამინისტროს წარმომადგენლები საზოგადოებას გააცნობენ „პატრიოტი 2011"-ში მონაწილეთა შერჩევის შედეგებს, ასევე იმ სიახლეებს რაც პატრიოტებს ანაკლიის საერთაშორისო ბანაკში ელით.
საერთაშორისო პროგრამა „პატრიოტი" წელს ანაკლიაში ჩატარდება. ბანაკი კეთილმოეწყო ევროპული სტანდარტების შესაბამისად - აშენდა აკვაპარკი, საველოსიპეტო და სასკეიტბორდო ტრასები.
საერთაშორისო ბანაკში მონაწილეების შერჩევის პროცესი ძალიან გამჭვირვალედ ჩატარდა. მსურველებმა შეავსეს ონლაინ-სააპლიკაციო ფორმები და კითხვარზე გაცემული პასუხების საფუძველზე შეირჩნენ. პროგრამაში მონაწილეობას საქართველოსა და მსოფლიოს მასშტაბით ორი ასაკობრივი ჯგუფი - 14-17 და 18-21 იღებს. ანაკლია უმასპინძლებს როგორს საქართველოს ყველა კუთხიდან, ასევე ევროპის, ამერიკის, აზიასა და აფრიკიის 35 ქვეყნიდან 600-მდე ახალგაზრდას.
„პატრიოტი 2011"-ში საქართველოს პრეზიდენტის ინიციატივით დაწესებულია კვოტა საქართველოში მცხოვრები ეთნიკურად არაქართველი ახალგაზრდებისთვის. სპეციალურად მათთვის მომზადდა ქართული ენის შემსწავლელი თანამედროვე და ეფექტური კურსი. აღნიშნული სიახლე მიზნად ისახავს ეთნიკარად არაქართველი მოსახლეობის საზოგადოების ცხოვრებაში აქტიურ მონაწილეობას.
25 მაისს, ანაკლიის საერთაშორისო ბანაკი მონაწილეთა პირველ ნაკადს მიიღებს. სულ ჩატარდება 13 ნაკადი და პროგრამა 25 ოქტომბრამდე გაგრძელდება. თითოეულ ნაკადზე ბანაკში 280 მონაწილე იქნება. სულ საერთაშორისო ბანაკში 3640 ახალგაზრდა მიიღებს მონაწილეობას. პატრიოტები დაიყოფებიან რაზმებად, რომლებსაც სპეციალურად შერჩეული „ლიდერები" უხელმძღვანელებენ.
პროგრამის ლიდერები რამდენიმე ეტაპიანი კონკურსის საფუძველზე შეირჩნენ და მათ ერკვირიანი ტრეინინგი ჩაუტარდათ.
საერთაშორისო ბანაკში ახალგაზრდები მონაწილეობას მიიღებენ სპორტულ, კულტურულ-შემეცნებით და საგანმანათლებლო ღონისძიებებში.
პროგრამა „პატრიოტი", საქართველოს პრეზიდენტის ინიციატივით, 2005 წელს ამოქმედდა. „პატრიოტი 2011"-ის ორგანიზატორია საქართველოს სპორტისა და ახალგაზრდობის საქმეთა სამინისტრო.
„პატრიოტის" მიზანია სოციალური ინტეგრაციის ხელშეწყობა, ახალგაზრდების ფიზიკური, სულიერი და ინტელექტუალური პოტენციალის ამაღლება, აქტიური და ჯანსაღი ცხოვრების წესის პოპულარიზაცია.
